Kishore Biyani: एकेकाळी भारताचे ‘रिटेल किंग’ म्हणून ओळखले जाणारे किशोर बियाणी यांच्या अडचणी वाढल्या आहेत. केंद्रीय अन्वेषण ब्युरोने (CBI) 904.32 कोटी रुपयांच्या कथित बँक घोटाळ्याप्रकरणी फ्युचर रिटेल लिमिटेड आणि कंपनीचे प्रवर्तक किशोर बियाणी यांच्याविरोधात गुन्हा दाखल केला आहे. या प्रकरणात त्यांचे भाऊ राकेश बियाणी यांचाही समावेश आहे. शुक्रवारी मुंबईतील कंपनीशी संबंधित ठिकाणी सीबीआयने झडती घेतल्याची माहिती समोर आली आहे.
Stock Market : भारतीय शेअर बाजारासाठी नोव्हेंबर महिन्याची सुरुवात अत्यंत उत्साहवर्धक ठरली आहे. 2 ते 6 नोव्हेंबरदरम्यान बाजारात जोरदार तेजी पाहायला मिळाली. या ...
SBI च्या तक्रारीवरून गुन्हा दाखल
स्टेट बँक ऑफ इंडिया (SBI) च्या मुंबईतील स्ट्रेस्ड असेट्स मॅनेजमेंट ब्रांच-3 ने केलेल्या तक्रारीच्या आधारे सीबीआयने ही कारवाई केली. सीबीआयच्या प्रवक्त्याने दिलेल्या माहितीनुसार, फ्युचर रिटेल लिमिटेड, कंपनीचे प्रवर्तक, व्यवस्थापकीय संचालक, कार्यकारी संचालक, जामीनदार किशोर बियाणी आणि राकेश बियाणी यांच्यासह अज्ञात सरकारी अधिकारी आणि इतर व्यक्तींविरोधात गुन्हा दाखल करण्यात आला आहे.
या प्रकरणात फसवणूक, गुन्हेगारी कट आणि भ्रष्टाचार प्रतिबंधक कायद्यांतर्गत आरोपांचा समावेश आहे. मात्र, हे सर्व आरोप असून त्यांची चौकशी अद्याप सुरू आहे.
बँक कर्जाचा गैरवापर केल्याचा आरोप
सीबीआयच्या म्हणण्यानुसार, SBI आणि नऊ बँकांच्या समूहाकडून कर्ज सुविधा मिळवण्यासाठी आरोपींनी कट रचल्याचा आरोप बँकेच्या तक्रारीत करण्यात आला आहे. कंपनीने कर्जातून मिळालेल्या निधीचा वापर मंजूर उद्देशांऐवजी अन्य कारणांसाठी केल्याचा आरोपही करण्यात आला आहे.
फ्युचर रिटेल लिमिटेड बिग बाजार, फॅशन ॲट बिग बाजार आणि फूडहॉल यांसारखे किरकोळ व्यवसाय चालवत होती. या प्रकरणाच्या तपासादरम्यान सीबीआयने मुंबईतील संबंधित परिसरांची झडती घेतली. या कारवाईत तपासाशी संबंधित कागदपत्रे जप्त करण्यात आल्याची माहिती सीबीआयने दिली आहे. दरम्यान, या प्रकरणावर कंपनीकडून तातडीने कोणतीही प्रतिक्रिया देण्यात आलेली नाही.
फ्युचर रिटेलची आर्थिक स्थिती खालावली
एकेकाळी भारतीय रिटेल क्षेत्रातील प्रमुख कंपन्यांमध्ये फ्युचर रिटेलचा समावेश होता. बिग बाजारच्या माध्यमातून कंपनीने देशभरातील ग्राहकांमध्ये लोकप्रियता मिळवली होती. मात्र, आर्थिक संकट आणि व्यवसायातील अडचणींमुळे कंपनीची स्थिती खालावत गेली.
फ्युचर रिटेलच्या शेअर्समधील व्यवहार दीर्घकाळापासून स्थगित आहेत. उपलब्ध माहितीनुसार, बीएसईवर शेअरची शेवटची नोंदवलेली किंमत 2.41 रुपये होती. सीबीआयच्या ताज्या कारवाईमुळे कंपनी आणि तिच्या प्रवर्तकांशी संबंधित आर्थिक प्रकरण पुन्हा चर्चेत आले आहे.