Nashik : सोशल मीडियावर खोटे व्हिडिओ बनवणे पडले महागात ! महिलेसह तिघांवर नाशिक पोलिसांची कारवाई

नाशिक : सोशल मीडियावर प्रसिद्धी मिळवण्यासाठी काहीही करण्याची तयारी असलेल्या लोकांना आता सावध राहण्याची गरज आहे. लाईक्स आणि व्ह्यूज मिळवण्यासाठी खोट्या घटना घडवून आणणे, पोलिसांच्या बंदोबस्ताबाबत अफवा पसरवणे आणि दिशाभूल करणारे व्हिडिओ तयार करणे महिलेसह तिघांना चांगलेच महागात पडले आहे. नाशिक शहर पोलिसांनी या प्रकाराची गंभीर दखल घेत संबंधितांविरोधात कायदेशीर कारवाई केली आहे.

सिंहस्थ कुंभमेळ्याच्या ध्वजारोहणाचा कार्यक्रम आणि राष्ट्रपती द्रौपदी मुर्मू यांच्या ३१ ऑक्टोबर रोजी झालेल्या नाशिक दौऱ्याच्या पार्श्वभूमीवर शहरात कडक पोलीस बंदोबस्त तैनात करण्यात आला होता. अशा संवेदनशील परिस्थितीचा गैरफायदा घेत काही जणांनी सोशल मीडियावर खोटे आणि दिशाभूल करणारे व्हिडिओ प्रसारित केल्याचे समोर आले आहे.

लाईक्स आणि व्ह्यूजसाठी बनवले बनावट व्हिडिओ

सोशल मीडियावर अधिकाधिक प्रसिद्धी मिळवण्यासाठी काही जणांनी जाणीवपूर्वक बनावट घटना घडवून आणल्या. या घटनांचे चित्रीकरण करून ते रिल्सच्या माध्यमातून सोशल मीडियावर व्हायरल करण्यात आले.प्रत्यक्षात अशा घटना घडलेल्या नसतानाही त्या घडल्याचा भास निर्माण करून नागरिकांमध्ये संभ्रम आणि गैरसमज पसरवण्याचा प्रयत्न करण्यात आला. पोलिसांच्या बंदोबस्ताबाबत तसेच शहरातील विविध विषयांवर दिशाभूल करणारे व्हिडिओ तयार करण्यात आल्याचे तपासात समोर आले.

व्हिडिओ व्हायरल झाल्यानंतर मागितली माफी

संबंधित व्हिडिओ सोशल मीडियावर व्हायरल झाल्यानंतर काही संशयितांनी आपली चूक लक्षात आल्याचे सांगत माफी मागणारे व्हिडिओही अपलोड केले. मात्र, केवळ माफी मागून अशा प्रकारातून सुटका होणार नाही, अशी भूमिका नाशिक शहर पोलिसांनी घेतली आहे.या प्रकरणात पोलिसांनी महिलेसह तिघांविरोधात गुन्हे दाखल करून कायदेशीर कारवाई केली आहे. सोशल मीडियावरील प्रसिद्धीसाठी कायदा व सुव्यवस्थेला बाधा पोहोचवणारे प्रकार खपवून घेतले जाणार नसल्याचा स्पष्ट संदेश पोलिसांनी दिला आहे.

नाशिक पोलिसांचा सोशल मीडिया वापरकर्त्यांना इशारा

नाशिक शहर पोलिसांनी आपल्या अधिकृत सोशल मीडिया हँडलवरून नागरिकांना महत्त्वाचे आवाहन केले आहे. रचनात्मक टीका आणि सूचना यांचे पोलिसांकडून स्वागत केले जाईल. मात्र, कोणत्याही कार्यक्रमात किंवा पोलीस बंदोबस्तादरम्यान जाणीवपूर्वक गोंधळ निर्माण करणे, स्टंटबाजी करणे किंवा खोट्या अफवा पसरवणे सहन केले जाणार नाही. यापुढे अशा प्रकारांना कोणतीही पूर्वसूचना न देता थेट कठोर कायदेशीर कारवाई केली जाईल, असा इशाराही पोलिसांनी दिला आहे.

नागरिकांनी व्हायरल व्हिडिओवर विश्वास ठेवण्यापूर्वी पडताळणी करावी

सोशल मीडियावर व्हायरल होणाऱ्या प्रत्येक व्हिडिओवर किंवा पोस्टवर विश्वास ठेवणे टाळावे. विशेषतः लाईक्स आणि व्ह्यूज मिळवण्यासाठी एडिट केलेले, बनावट किंवा स्टंट करून तयार केलेले व्हिडिओ नागरिकांची दिशाभूल करू शकतात. त्यामुळे अशा पोस्ट शेअर करण्यापूर्वी त्यांची सत्यता तपासावी आणि अफवा पसरवण्यास हातभार लावू नये, असे आवाहन नाशिक शहर पोलिसांनी केले आहे.सोशल मीडियावरील प्रसिद्धीच्या हव्यासापोटी कायद्याचे उल्लंघन केल्यास त्याचे परिणाम गंभीर असू शकतात, हे या कारवाईतून स्पष्ट झाले आहे.