नागपूर: पाटण्यातील विरोधकांच्या बैठकीवरुन उद्धव ठाकरे (Uddhav Thackrey) विरुद्ध देवेंद्र फडणवीस (Devendra Fadanvis) यांच्यात कलगीतुरा रंगला आहे. उद्धव ठाकरे यांनी फडणवीसांच्या टीकेवर घणाघात करत सडेतोड उत्तर दिलं आहे. उद्धव ठाकरे यांनी देवेंद्र फडणवीस यांच्या परिवारावर टीका करत तुम्हाला शवासन करावे लागेल असे वक्तव्य केले होते. यावर देवेंद्र फडणवीस यांनी मुख्यमंत्रीपदी राहिलेल्या माणसाला इतकी ‘बालबुद्धी’ असावी, याचे मात्र आश्चर्य वाटते, अशा शब्दांत उत्तर दिलं. त्यांनी याबाबत ट्वीट केलं आहे.
पाटण्यातील विरोधकांची बैठक ही कुटुंब बचाओ मोहीम होती, अशी टीका काल देवेंद्र फडवणीस यांनी केली होती. त्यावर उद्धव ठाकरे म्हणाले होते की, मी पाटण्याला गेलो होतो, पण लगेच देवेंद्र फडणवीस म्हणाले हे परिवार बचाव बैठकीला गेले आहेत. देवेंद्रजी एवढ्या पातळीवर येऊ नका, परिवार तुम्हाला सुद्धा आहे. तुमच्या परिवाराचे सुद्धा व्हॉट्सॅप चॅट बाहेर येत आहेत, आलेले आहेत. आम्ही त्यावर बोललेलो नाही. जर आम्ही बोललो तर तुम्हाला शवासन करावं लागेल.
उद्धव ठाकरे यांना देवेंद्र फडणवीस यांनी ट्वीटच्या माध्यमातून उत्तर दिलं आहे. देवेंद्र फडणवीस लिहितात की, "मी, माझे कुटुंब आणि माझा संपूर्ण भाजपा परिवार एक खुली किताब आहे उद्धव ठाकरे! ज्या ‘व्हॉटसअ‍ॅप चॅट’ बाबत तुम्ही बोलताय, ते आरोपपत्राचे भाग आहेत. न्यायालयाच्या रेकॉर्डवर आहेत आणि जाणीवपूर्वक टाकले आहेत, कारण, लपवण्यासारखे आमच्याकडे काहीच नाही. पण, मुख्यमंत्रीपदी राहिलेल्या माणसाला इतकी ‘बालबुद्धी’ असावी, याचे मात्र आश्चर्य वाटते. त्यामुळे त्याची फार चिंता तुम्ही करु नका.
चिंता करायचीच असेल आणि पुस्तक काढायचेच असेल तर यावर काढा
- सामान्य शिवसैनिकांना वार्‍यावर सोडून मुख्यमंत्रीपद, मंत्रिपद घरात कसे ठेवले यावर...
- मुंबईला कुणी लुटले यावर...
- मृतांच्या टाळूवरील लोणी कुणी खाल्ले यावर...
- मराठी माणसाला कुणी ओरबाडले यावर...
- 100 कोटींच्या वसुलीचे टार्गेट कसे दिले जाते यावर...
- तुमचे हिंदूत्त्व आणि तुमचे कारनामे आता एकेक करीत जनतेत उघड होतच आहेत आणि होतच राहणार
- आम्ही कुणाच्या घरात घुसत नाही. पण, घुसलोच तर त्यांना तोंड दाखवायला जागा उरणार नाही.
- तुमचे ‘नड्डे’ केव्हा सैल होतील, हे समजणार देखील नाही. (नड्डे म्हणजे घसा)
- तोवर तुमची हास्यजत्रा चालू द्या...
- बघूच आता शवासन कुणाला करावे लागते ते…"