आगामी एकदिवसीय विश्वचषक स्पर्धेत भारतीय खेळाडू दिनेश कार्तिक समालोचक म्हणून दिसू शकतो.
कार्तिकने स्वत: ट्वीट करत ही माहिती दिली.एका चाहत्याने ट्वीट करून कार्तिकला प्रश्न विचारला की, आगामी एकदिवसीय विश्वचषक स्पर्धेत भारताचा विकेटकीपर कोण असेल?” यावर दिनेश कार्तिकने प्रत्युत्तर दिले. फॅन्सच्या ट्वीटला उत्तर देत कार्तिकने आणखी एक ट्वीट केले आहे. त्याने लिहिले की, “तुम्ही मला विश्वचषकात नक्कीच पाहाल पण ते सर्व बीसीसीआयच्या हातात आहे, अजून काय सांगू…” यासोबतच कार्तिकने एक लक्षवेधी इमोजीही टाकला आहे. या ट्वीटमध्ये त्याने म्हटले आहे की, विश्वचषकात तो खेळाडू म्हणून नव्हे, तर समालोचक म्हणून नक्कीच पाहायला मिळेल. नुकत्याच झालेल्या अॅशेसमध्ये कार्तिक समालोचन करताना दिसला होता.
५ ऑक्टोबरपासून भारतात एकदिवसीय विश्वचषक स्पर्धेला सुरुवात होणार आहे. या स्पर्धेत १० संघ खेळणार आहेत. एकूण ४८ सामने भारतातील विविध १० ठिकाणी खेळवले जातील. जगातील सर्वात मोठे क्रिकेट स्टेडियम अहमदाबाद येथील नरेंद्र मोदी स्टेडियमवर गतविजेता इंग्लंड आणि न्यूझीलंड यांच्यात ५ नोव्हेंबरला पहिला सामना खेळवला जाणार आहे. तर अंतिम सामना १९ नोव्हेंबरला अहमदाबादमध्येच होणार आहे. भारतीय संघ ८ ऑक्टोबर रोजी चेन्नई येथे ऑस्ट्रेलियाविरुद्ध आपल्या मोहिमेला सुरुवात करेल.