पुरी : ओडिशामधील पुरी येथील जगन्नाथ मंदिरात (Jagannath Puri Temple) आता भाविकांसाठी ड्रेस कोड (Dress Code For Devotees At Jagannath Temple) लागू करण्यात आल्याचे मंदिर व्यवस्थापनाने सांगितले. ड्रेस कोड लागू झाल्यानंतर लोकांना हाफ पँट, फाटलेल्या जीन्स, स्कर्ट आणि स्लीव्हलेस कपडे घालून जगन्नाथ मंदिरात जाता येणार नाही.
हा निर्णय मंदिराच्या धोरण उपसमितीच्या बैठकीत घेण्यात आला आहे. त्यानुसार, पुढील वर्षी १ जानेवारीपासून ड्रेस कोड लागू केला जाणार आहे. यासाठी भाविकांना ड्रेस कोडबद्दल जागरूक केले जाणार आहे.
जगन्नाथ मंदिर व्यवस्थापनाचे प्रमुख रंजन कुमार दास यांनी सांगितले की, काही लोक अशोभनीय कपडे घालून मंदिरात येतात. काही लोक हाफ पँट आणि स्लीव्हलेस कपडे घालून येतात, जणू ते समुद्रकिनारी किंवा उद्यानात फिरायला आले आहेत. देव मंदिरात राहतो. हे मनोरंजनाचे ठिकाण नाही. यामुळे इतर लोकांच्या धार्मिक भावना दुखावल्या जातात. त्यामुळे हा निर्णय घ्यावा लागला, असे त्यांनी सांगितले.