केंद्र सरकारकडून पुणे पोलिसांना चौकशी करण्याचे आदेश जारी
पुणे : काही दिवसांपासून वादाच्या भोवऱ्यात असणाऱ्या आयएएस अधिकारी पूजा खेडकरचे (IAS Pooja Khedkar) सातत्याने नवीन कारनामे समोर येत आहेत. अशातच आता खेडकर कुटुंबियांबाबत आणखी एक प्रकार उघडकीस आला आहे. पूजा खेडकर यांनी आयएएस अधिकारी बनण्यासाठी कमी उत्पन्न दाखवण्याच्या प्रयत्नात स्वत:च्या आई-वडिलांचा घटस्फोट (Divorced) झाल्याचे दाखवले. याप्रकरणी वादग्रस्त प्रोबेशनरी आयएएस अधिकारी पूजा खेडकर यांची चौकशी सुरु केली जाणार आहे. त्यामुळे पूजा खेडकर यांच्या अडचणीत आणखी भर पडणार असल्याचे चित्र दिसून येत आहे.
आयएएस अधिकारी पूजा खेडकर या खासगी गाडीवर लाल दिवा लावणे आणि स्वतंत्र केबिनसाठी आग्रह केल्यामुळे त्या चर्चेत आल्या होत्या. त्यानंतर हे प्रकरण खेडकर यांच्या शारीरिक अपंगत्व आणि ओबीसी प्रमाणपत्रपर्यंत पोहोचले होते. आता पूजा खेडकर यांनी आई-वडिलांचा घटस्फोट झाल्याचे भासवून कमी उत्पन्न दाखविण्याचा प्रयत्न केल्याची शक्यता वर्तवली जात आहे. त्यामुळे पूजा खेडकर यांचे आई-वडील मनोरमा खेडकर (Manorama Khedkar) आणि दिलीप खेडकर (Dilip Khedkar) या दाम्पत्याचा खरच घटस्फोट झाला आहे का? याची चौकशी करण्याचे आदेश केंद्र सरकारने पुणे पोलिसांना दिले असून याबाबत सविस्तर अहवालही केंद्र सरकारने मागवला आहे.
दरम्यान, मनोरमा खेडकर यांच्यावर शेतकऱ्यांना बंदुकीचा धाक दाखवत धमकावल्याप्रकरणी गुन्हा दाखल केला होता. त्यानंतर महाडमधून पुणे पोलिसांनी मनोरमा खेडकर यांना अटक केली होती. याबाबत न्यायालयाने मनोरमा खेडकर यांना १४ दिवसांची कोठडी सुनावली असून त्या सध्या त्या न्यायालयीन कोठडीमध्ये आहेत.