नागपूर : भारत आणि इंग्लंड यांच्यातील पाच सामन्यांच्या टी-२० मालिकेनंतर बहुप्रतिक्षित एकदिवसीय मालिका नागपूरच्या विदर्भ क्रिकेट असोसिएशन स्टेडियमवर सुरू होणार आहे. या मालिकेत एकूण तीन एकदिवसीय सामने खेळले जाणार आहेत. त्यातील पहिला सामना 6 फेब्रुवारी रोजी खेळला जाणार असून रविवारी सकाळी १० वाजतापासून या सामन्याची ऑनलाईन तिकिट विक्रीला सुरुवात झाली आणि अवघ्या काही मिनिटातच संपूर्ण तिकिटे विकली गेली.
नागपूरमधील सामन्यासाठी तिकिटविक्री ऑनलाईन पद्धतीने करण्यात आली.सहा वर्षानंतर नागपुरात सामना होत असल्याने तिकिटविक्री सुरू होण्यापूर्वी एक लाखाहून अधिक चाहते ऑनलाईन वेटिंग लिस्ट मध्ये होते.ही तिकिटविक्री जोमॅटोच्या डिस्ट्रिक्ट ॲपच्या माध्यमातून झाली.व्हीसीएने प्रत्येक व्यक्तीला तिकिटविक्रीसाठी दोन तिकिटांची मर्यादा घातली असल्यामुळे अनेकांनी एकापेक्षा अधिक डिव्हाईसमधून तिकिटसाठी प्रयत्न केले.
सामान्य लोकांसाठी तिकिटविक्री सुरू होण्यापूर्वी व्हीसीए सदस्यांना तिकिटविक्री करण्यात आली. ऑनलाईन तिकिट घेतल्यावर लोकांना ३ ते ५ फेब्रुवारीदरम्यान प्रत्यक्ष तिकिट घ्यावे लागेल. व्हीसीएच्या सिव्हिल लाईन्स येथील मैदानावर ३ ते ५ फेब्रुवारी दरम्यान सकाळी ९.३० ते रात्री ८.३० दरम्यान चाहत्यांना तिकिट घ्यावे लागेल. ६ फेब्रुवारी रोजी सामन्याच्या दिवशी सकाळी ९ ते दुपारी २ पर्यंत ही सुविधा उपलब्ध राहील. यंदाही शाळेच्या विद्यार्थ्यांसाठी तसेच अनाथ मुलांसाठी व्हीसीएमार्फत तिकिट उपलब्ध करून देण्यात आले.
सकाळी १०.३० च्या दरम्यान बहुतांश तिकिटांची विक्री झाली होती. यानंतरही सुमारे पन्नास हजार लोक प्रतीक्षा यादीत होते. समाज माध्यमावर अनेक लोकांनी तिकिट न मिळण्याची तक्रार केली. दुसरीकडे, समाज माध्यमांवरच अनेक लोकांनी तिकिटे मिळाली असून तिकिटे ब्लॅकमध्ये विकण्याबाबत संदेश टाकले. ८०० रुपयांची तिकिटाची किंमत २ ते ३ हजार तर एक हजाराच्या तिकिटाचा दर पाच ते सात हजार रुपये सांगण्यात येत आहे.