मुंबई: आयसीसी चॅम्पियन्स ट्रॉफी २०२५मध्ये दुसरा सेमीफायनलचा सामना न्यूझीलंड आणि दक्षिण आफ्रिका यांच्यात खेळवला जात आहे. हा सामना लाहोरच्या गद्दाफी स्टेडियमवर होत आहे. या सामन्यात न्यूझीलंडने दक्षिण आफ्रिकेला विजयासाठी ३६३ धावांचे आव्हान दिले आहे.
न्यूझीलंडने ५० षटकांत ६ बाद ३६२ धावा केल्या. चॅम्पियन्स ट्रॉफीच्या इतिहासातील ही सर्वात मोठी धावसंख्या आहे. न्यूझीलंडने ऑस्ट्रेलियाचा रेकॉर्ड तोडला आहे. चॅम्पियन्स ट्रॉफीच्या या हंगामात ऑस्ट्रेलियाने इंग्लंडविरुद्ध ५ बाद ३५६ धावा केल्या होत्या.
दक्षिण आफ्रिका आणि न्यूझीलंड यांच्यातील विजेता संघ फायनलमध्ये प्रवेश करणार आहे. त्यांचा मुकाबला रोहित शर्माच्या नेतृत्वातील भारतीय संघाशी होणार आहे. चॅम्पियन्स ट्रॉफीचा हा फायनल सामना ९ मार्चला दुबईच्या आंतरराष्ट्रीय क्रिकेट स्टेडियममध्ये खेळवला जाईल. याआधी पहिल्या सेमीफायनलमध्ये भारताने ऑस्ट्रेलियाला ४ विकेट राखत हरवले होते.
केन विल्यमसन्स आणि रचीन रवींद्रची दमदार शतके
टॉस जिंकत पहिल्यांदा फलंदाजी करताना न्यूझीलंडने ५० षटकांत ६ बाद ३६२ धावा केल्या. सामन्यात न्यूझीलंडची सुरूवात चांगली राहिली. विल यंग आणि रचिन रवींद्रने मिळून ७.५ षटकांत ४८ धावांची भागीदारी केली. यंग २२ धावा करून परतला. त्यानंतर केन विल्यमसन्स आणि रचिन रवींद्रने दुसऱ्या विकेटसाठी १६४ धावांची भागीदारी केली.