पुणे: महाराष्ट्रात अनेक भागात अवकाळी पावसाने कहर केला आहे. कुठे मेघगर्जना, तर कुठे वादळी पाऊस आणि गारपीटमुळे जनसामान्यांची त्रेधातिरपट उडाली आहे. हवामान खात्याने अनेक जिल्ह्यांमध्ये पावसाचा इशारा जारी केला आहे. पुणे शहर आणि त्याच्या परिसरात काल (सोमवार) पासून अवकाळी पाऊस (Unseasonal Rain) पडत आहे. आज (मंगळवार) देखील शहराच्या मध्यवर्ती भागात पाऊसाची रिमझिम पुणेकरांना (Pune Rain) अनुभववायला मिळत आहे. ऐन उन्हाळ्यात बरसणारा हा पाऊस पुण्यात पुढील ४ दिवस देखील पडणार असल्याचे भाकीत हवामान खात्याने (IMD) नोंदवले आहे.
आज सकाळपासून पुणे शहरात ढगाळ वातावरण होते आणि सकाळी ११:३० च्या सुमारास मुसळधार पाऊस सुरू झाला. अचानक झालेल्या पावसामुळे लोकांची प्रचंड धावपळ झाली.
पुण्यात चार दिवस यलो अलर्ट
मे महिन्याच्या गरमीत पुणे शहरात अचानक सुरू झालेल्या अवकाळी पावसामुळे वातावरणात थंडावा निर्माण झाला आहे. त्यामुळे पुणेकरांना उष्णतेपासून दिलासा मिळाला आहे. असेच वातावरण पुढील काही दिवस राहणार असून, मेघगर्जना आणि विजांच्या कडकडाटासह हलका ते मध्यम पाऊस पडण्याची शक्यता वर्तवण्यात आली आहे. त्यामुळे पुढील चार दिवस पुणे शहरात 'यलो' अलर्ट जारी करण्यात आला आहे.
मुंबईत वादळाचा अंदाज
आज मुंबईच्या पश्चिम उपनगरात सकाळपासूनच पाऊसाला सुरुवात झाली. दरम्यान, आज (मंगळवार) आणि उद्या (बुधवार) मुंबईत 'यलो अलर्ट' जारी करण्यात आला आहे. ठाणे आणि मुंबईत वादळाचा अंदाज आहे आणि दक्षिण कोकणातही 'यलो अलर्ट' जारी करण्यात आला आहे.
तर एकंदरीत राज्याचे हवामान पाहिल्यास, अहिल्यानगर, पुणे, कोल्हापूर, सातारा, सांगली, सोलापूर या जिल्ह्यांतील घाट भागात पावसाचा इशारा देण्यात आला आहे.