पुणे : पुणेकरांसाठी महत्वाची बातमी आहे. पुण्यातील सर्वाधिक वर्दळीचा रस्ता म्हणून ओळखल्या जाणाऱ्या फर्ग्युसन कॉलेज (एफसी) रोडवर आता वाहतूक नियमांचे उल्लंघन करणाऱ्यांवर आर्टिफिशियल इंटेलिजन्स (एआय) आधारित कॅमेरा सिस्टिम करडी नजर ठेवणार आहे. पुणे वाहतूक पोलिसांनी नुकत्याच त्यांच्या ट्विटर अकाऊंटवर याबाबत माहिती दिली आहे. एफसी रोडवर आर्टिफिशियल इंटेलिजन्स (AI) आधारित कॅमेरा सिस्टिम द्वारे पोलिस करडी नजर ठेवणार आहेत. यामुळे नियम मोडणाऱ्यांवर त्वरित कारवाई करणे पोलिसांना शक्य होणार आहे.
रात्रीच्या वेळीही कार्यरत राहतात AI कॅमेरे
या नव्या तंत्रज्ञानामुळे नियम मोडणाऱ्यांना आता सहजासहजी सुटका मिळणार नाही. एफसी रोडवरील एआय- कॅमेरे अत्याधुनिक तंत्रज्ञानाने सुसज्ज आहेत. हे कॅमेरे वाहनांचे नंबर प्लेट स्कॅन करून नियमांचे उल्लंघन करणाऱ्या वाहनचालकांना तात्काळ ओळखतात. सिग्नल तोडणे, चुकीच्या मार्गाने वाहन चालवणे, हेल्मेट न घालणे, किंवा गतीमर्यादा ओलांडणे यासारख्या गोष्टी या कॅमेरे सहज टिपतात. यामुळे पोलिसांना त्वरित कारवाई करणे शक्य होणार आहे. विशेष म्हणजे, हे कॅमेरे रात्रीच्या वेळीही अचूक काम करतात, ज्यामुळे चोवीस तास पाळत ठेवणे शक्य होईल.
मोबाईल नंबरवर चलान येणार
पुणे वाहतूक पोलिसांनी सांगितले की, AI कॅमेरांद्वारे ओळखले जाणारे उल्लंघन करणाऱ्या वाहनचालकांना दंडाची रक्कम थेट त्यांच्या नोंदणीकृत मोबाईल क्रमांकावर SMSद्वारे पाठवली जाईल. यामुळे वाहतूक नियमांचे पालन करण्याची जबाबदारी वाहनचालकांमध्ये वाढेल आणि कारवाईत पारदर्शकता येईल. तसेच, वारंवार नियम मोडणाऱ्या वाहनचालकांवर कठोर कारवाईचा इशारा पोलिसांनी दिला आहे. यामध्ये परवाना रद्द करणे किंवा अन्य कायदेशीर कारवाईचा समावेश असू शकतो.
चालकांना नियमांचे पालन करण्याचे आवाहन
एफसी रोड हा पुण्यातील सर्वात व्यस्त रस्त्यांपैकी एक आहे. येथे दररोज हजारो वाहने ये-जा करतात. यामुळे वाहतूक नियमांचे उल्लंघन होण्याचे प्रमाणही अधिक आहे. पुणे वाहतूक पोलिसांनी सर्व वाहनचालकांना नियमांचे काटेकोरपणे पालन करण्याचे आवाहन केले आहे. हेल्मेट घालणे, सिग्नलचे पालन करणे, गतीमर्यादा राखणे आणि योग्य मार्गाने वाहन चालवणे यासारख्या साध्या गोष्टींमुळे रस्त्यावरील अपघात टाळता येतील आणि वाहतूक सुरक्षित होईल.