राशिद खानने आयपीएल २०२५ मध्ये १५ सामन्यांत ५५ षटके टाकली, ५७.११ च्या सरासरीने ५१४ धावा देत फक्त नऊ बळी घेतले. यंदाच्या आयपीएलमध्ये प्रतिस्पर्धी संघांच्या फलंदाजांनी राशिदच्या गोलंदाजीवर ३३ षटकार मारले.
एलिमिनेटर सामन्यात गुजरात टायटन्स आणि मुंबई इंडियन्स आमनेसामने होते. या सामन्यात मुंबईचा २० धावांनी विजय झाला आणि गुजरातचे आयपीएल २०२५ मधील आव्हान संपुष्टात आले. चंदिगडमध्ये झालेल्या एलिमिनेटरमध्ये राशिदने चार षटकांत ३१ धावा दिल्या. या महत्त्वाच्या सामन्यात त्याला एकही बळी मिळवणे जमले नाही.यंदाच्या आयपीएलमधील राशिदचे हे अपयश गुजरात टायटन्सला भोवले. अफगाणिस्तानचा लेगस्पिनर राशिद खान आयपीएलच्या आधीच्या हंगामात प्रभावी ठरला होता. यामुळेच गुजरात टायटन्सने राशिद खानला १८ कोटी रुपये मोजून रिटेन केले होते. पण यावेळी राशिद अपेक्षित कामगिरी करण्यात अपयशी ठरला.