प्रतिनिधी: आरबीआयच्या रेपो दरात कपात करण्याचा निर्णयाचे स्वागत शेअर बाजाराने जोरात सुरू केले आहे. आरबीआयच्या २५ बीपीएस ऐवजी ५० बीपीएस अंशाने कपात करण्याच्या निर्णयाच्या पार्श्र्वभूमीवर बाजाराने जोरदार उसळी घेतली आहे. सेन्सेक्सने ८४५.३८ अंशाने (१.०४ टक्के) वाढत ८२२७०.११ पातळीवर पोहोचला आहे. निफ्टी २७४.५० अंशाने (१.११%) उसळत २५०२५.४० पातळीवर पोहोचला आहे.
सकाळच्या सत्रात सुरूवातीलाच सेन्सेक्स १२१.२५ अंशाने तर निफ्टी २८.५० अंशाने घसरला होता. सुरुवातीला गिफ्ट निफ्टीत घसरण झाल्यानंतर बाजाराने आगामी दरात कपात किती होईल यासाठी सावधतेचा पवित्रा घेतला. मात्र आता सर्व स्तरांवर या निर्णयाचे स्वागत झाले. निर्णय जाहीर झाल्यानंतरच रियल्टी समभाग (Shares) २.८० टक्क्यांनी वाढले असून ऑटो निर्देशांकात १.१४ टक्क्यांनी वाढ झाली आहे.
शेअर बाजारात निर्णयानंतर श्रीराम फायनान्स (१%), बजाज फायनान्स (४.४९%), जेएसडब्लू स्टील (३.७७%), एचडीएफसी बँक (२.१०%), इटर्नल (२.६३%), एक्सिस बँक (३.७७%) समभागात मोठी वाढ झाली आहे. निफ्टी बँक निर्देशांक १.५३ टक्क्याने वाढला आहे तर सेन्सेक्स बँक निर्देशांक ०.१७ टक्क्याने घसरला होता. मिडकॅप व स्मॉलकॅपमध्ये मोठी वाढ झाली.