लोणावळा : पर्यटकांच्या आकर्षणाचा केंद्रबिंदू ठरणाऱ्या भुशी डॅममध्ये बुडून दोन तरुणांचा मृत्यू झाल्याची घटना रविवारी (८ जून) घडली. तरुणांचा ग्रुप धरणावर फिरायला गेला होता. यावेळी ही घटना घडली आहे.
मिळालेल्या माहितीनुसार, साहिल अश्रफ अली शेख आणि मोहम्मद जमाल अशी बुडून मृत्यू झालेल्या तरुणांची नावे आहेत.दोन्हीही तरुण उत्तर प्रदेशातील असून कामानिमित्त लोणावळ्यात राहत होते.रविवारी(दि.८) सुट्टी असल्याने लोणावळ्यात राहणाऱ्या तरुणांचा ग्रुप भुशी डॅम परिसरात फिरायला गेला होता.
धरण परिसरात फिरत असताना त्यांना पाणी पाहून पोहण्याचा मोह झाला. त्यामुळे सर्व मित्र धरणात उतरले.पाण्यात उतरल्यानंतर पोहत होते. दोघे बरेच आतमध्ये गेले. त्यांना पाण्याच्या खोलीचा अंदाज आला नाही आणि बुडायला लागले. इतर मित्रांनी मदतीसाठी आरडाओरड केली. पण, मदत मिळेपर्यंत दोघेही बुडाले होते.
या घटनेची माहिती मिळाल्यानंतर लोणावळा पोलीस, आपत्काली पथक आणि शिवदुर्ग टीम घटनास्थळी आली. त्यांनी पाण्यात शोध घेऊन दोन्ही तरुणांचे मृतदेह बाहेर काढले.