गुजरात : गुजरातमधील अहमदाबाद येथे एक भीषण विमान अपघात घडला असून, या घटनेने संपूर्ण देशाला हादरवून टाकले आहे. लंडनकडे जाणाऱ्या विमानाने उड्डाण घेतल्यानंतर अवघ्या पाच मिनिटांत हे विमान कोसळले. विमानात एकूण २४२ प्रवासी होते, ज्यामध्ये भारतीय, ब्रिटिश, पोर्तुगीज आणि कॅनेडियन नागरिकांचा समावेश होता. विशेष म्हणजे, या प्रवाशांमध्ये २ नवजात बाळं आणि ११ लहान मुलं देखील होती.
हे विमान थेट एका मेडिकल कॉलेजच्या इमारतीवर कोसळले, ज्यामुळे इमारतीचे मोठे नुकसान झाले असून १५ डॉक्टर जखमी झाल्याची माहिती समोर आली आहे. अपघातानंतरचे दृश्य अतिशय भयावह असून, विमानाचे अवशेष परिसरात विखुरलेले आहेत.
https://x.com/narendramodi/status/1933110947553681853
या दुर्घटनेनंतर पंतप्रधान नरेंद्र मोदींनी सोशल मीडियावर (X वर) प्रतिक्रिया देताना दु:ख व्यक्त केलं आहे. त्यांनी म्हटलं, अहमदाबादमधील विमान अपघाताने मला मोठा धक्का बसला आहे. ही घटना अतिशय दु:खद आहे. माझ्या भावना या घटनेत प्रभावित झालेल्या सर्वांच्या सोबत आहेत. मी संबंधित मंत्री आणि अधिकाऱ्यांच्या संपर्कात आहे, आणि मदतकार्य वेगाने सुरू आहे.
घटनास्थळी NDRF (राष्ट्रीय आपत्ती निवारण दल)च्या विविध टीम्स दाखल झाल्या असून ९० हून अधिक कर्मचारी मदतकार्य करत आहेत. बडोद्याहून आणखी एक टीम रवाना करण्यात आली आहे. सध्या अपघाताचे कारण अद्याप स्पष्ट झालेलं नाही, मात्र या अपघातामुळे मोठी जीवितहानी झाल्याची भीती व्यक्त केली जात आहे.
ही दुर्घटना केवळ तांत्रिक चुकांपुरती मर्यादित न राहता, संपूर्ण देशासाठी एक भावनिक हादरा ठरली आहे.