एकदिवसीय क्रिकेटमध्ये एकाच डावात २५ षटकांनंतर चेंडू बदलला जातो. नव्या नियमानुसार पहिल्या ३४ षटकांमध्ये दोन चेंडू वापरता येतील. नंतर ३५ ते ५० व्या षटकादरम्यान वापरलेल्या या दोन चेंडूंपैकी एक चेंडू वापरावा लागेल. जर सामना २५ षटकांपुरता मर्यादीत झाला तर एकच चेंडू वापरता येईल.
नाणेफेक होण्याआधी प्रत्येक संघाला पाच कन्कशन सब्सटीट्युट्स – एक फलंदाज, एक यष्टीरक्षक, एक गोलंदाज, एक फिरकीपटू, एक अष्टपैलू – यांची यादी सामनाधिकारी यांच्याकडे द्यावी लागेल. खेळाडूला दुखापत झाल्यास या यादीतून बदली खेळाडू घेण्याचे बंधन असेल. फलंदाजाच्या बदल्यात फलंदाज, गोलंदाजाच्या बदल्यात गोलंदाज, फिरकीपटूच्या बदल्यात फिरकीपटू, अष्टपैलूच्या बदल्यात अष्टपैलू, यष्टीरक्षकाच्या बदल्यात यष्टीरक्षक घेण्याचे बंधन असेल.
सीमारेषेबाहेर म्हणजेच बाउंडरी लाईनच्या बाहेर “बन्नी हॉप” करत घेतले जाणारे झेल अमान्य अर्थात अवैध असतील. क्रिकेटमध्ये चुरस वाढवणे, फलंदाज आणि गोलंदाज यांच्यात संतुलन राखणे आणि खेळ आणखी रंगतदार करणे यासाठी हे नियम करण्याचा निर्णय झाला आहे.
बन्नी हॉप म्हणजे काय ?
क्षेत्ररक्षकाचे पाय सीमारेषेबाहेर असताना त्याने चेंडू उडवणे आणि नंतर मैदानात येऊन झेलणे या पद्धतीने झेल घेण्याला 'बन्नी हॉप कॅच' म्हणतात. या 'बन्नी हॉप कॅच'ला अवैध ठरवण्यात आले आहे. पण क्षेत्ररक्षकाने मैदानात असताना चेंडू उडवला, नंतर क्षेत्ररक्षक सीमारेषेबाहेर गेला आणि तिथून परत मैदानात आल्यानंतर त्याने चेंडू झेलला तर ते वैध आहे.