कोल्हापूर : कोल्हापूर मधील आजरा तालुक्यात अवघ्या महिनाभरापूर्वी विवाह झालेल्या जोडप्याचा गॅस गिझरच्या लिकेजमुळे गुदमरून मृत्यू झाल्याची दुर्दैवी घटना घडली. सागर सुरेश करमळकर (वय ३२) व सुषमा सागर करमळकर (वय २६) अशी या नवदांपत्यांची नावे आहेत. महिनाभरापूर्वी लग्न झालेले करमळकर दाम्पत्य हे फिरण्यासाठी आंबोली येथे गेले होते. आंबोलीहून परतल्यानंतर भावेश्वरी कॉलनी येथील त्यांच्या राहत्या घरामध्ये त्यांचा मृत्यू झाला असल्याची माहिती समोर येत आहे .
सागरचे मित्र त्याला वारंवार फोन करत होते परंतु फोन उचलला जात नव्हता. कालांतराने फोन स्विच ऑफ झाल्याने मित्र परिवाराने सोमवारी सकाळी त्यांच्या घरी भेट देऊन माहिती घेण्याचा प्रयत्न केला असता गॅस गिझरचा गॅस लिकेज होऊन बाथरूममध्येच त्यांचा गुदमरून मृत्यू झाल्याचे निदर्शनास आले. घरामध्ये सर्वत्र गॅसचा वास होता. त्यामुळे गॅस लिकेजनेच सदर मृत्यू झाल्याची चर्चा परिसरात होती. मोठा मित्रपरिवार असणाऱ्या सागरच्या या दुर्दैवी मृत्यूमुळे सर्वत्र हळहळ व्यक्त होत आहे. त्याच्या पश्चात आई व भाऊ असा परिवार आहे.