इस्रायल आणि इराणमधील संघर्षादरम्यान, मागच्या ३ दिवसांमध्ये अमेरिकेची किमान ३० लढाऊ विमानं ही अमेरिकेच्या विविध तळांवरून युरोपमध्ये पाठवण्यात आली आहेत. ही सर्व विमाने सैन्यदलांमधील टँकर विमानं आहेत. ज्यांचा वापर लढाऊ विमानांमध्ये इंधन भरण्यासाठी होतो.
या आधी अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते खामेनी यांना बिनशर्त शरणागती स्वीकारण्यास सांगितले होते. "इराणचे सर्वोच्च नेते अयातुल्ला अली खामेनी कुठे लपले आहेत हे आम्हाला माहिती आहे. पण सध्या तरी त्यांना ठार मारायची इच्छा नाही," असं डोनाल्ड ट्रम्प यांनी म्हटलं. तसेच , इराणमध्ये नागरी वस्त्यांवर आम्हाला हल्ले करायची इच्छा नाही. मात्र आमचा संयम आता संपत चालला आहे, ही गोष्टही खरी आहे. इराणने अणुकरार करणे आवश्यक होते. त्यांना तशी विनंतीही मी केली होती. मात्र इराणने ते मान्य केले नाही. आता चर्चा करावी असे वाटत नाही, असंही डोनाल्ड ट्रम्प म्हणाले.
दरम्यान, डोनाल्ड ट्रम्प यांच्या या इशाऱ्याला इराणचे सर्वोच्च नेते खामेनी यांनी केराची टोपली दाखवली आहे. तसेच वरिष्ठ शास्त्रज्ञ आणि लष्करी अधिकाऱ्यांची इस्त्राइलने हत्या केल्यानंतरही युद्ध कायम ठेवण्याचा इशारा इराणने दिला आहे.इराणचे सर्वोच्च नेते अयातुल्ला अली खामेनी यांनी बुधवारी (दि. १८) एक्स पोस्ट करत युद्धाची घोषणा केली आहे..अली खामेनी यांनी आपले अधिकार इराणी सैन्याकडे सोपवले आहेत. खामेनी यांना त्यांच्या कुटुंबातील सदस्यांसह ईशान्य तेहरानमधील एका भूमिगत बंकरमध्ये हलवण्यात आल्यानंतर ही घोषणा करण्यात आली आहे.
अयातुल्ला अली खामेनी यांनी आधी "महान हैदरच्या नावाने, युद्ध सुरू झाले आहे," अशी पोस्ट केली. त्यानंतर काही वेळातच, खामेनींनी इस्रायलला इशारा देत, "आता दहशतवादी झिओनिस्ट राजवटीला कडक प्रत्युत्तर दिले पाहिजे. आम्ही त्यांच्याबाबतीत आता कोणतीही दया दाखवणार नाही," असं म्हटलं. या घोषणेनंतर इराणने इस्रायलवर २५ क्षेपणास्त्रे डागली.