इराण नव्याने तयार करत असलेल्या अण्वस्त्रांमुळे आमच्या सुरक्षेला धोका आहे, अशी भूमिका घेत इस्रायलने इराण विरुद्ध हवाई हल्ले सुरू केले आहेत. इस्रायलच्या हल्ल्यांना इराणकडून प्रत्युत्तर देणे सुरू आहे. इस्रायल प्रामुख्याने इराणची सैन्य शक्ती कमकुवत करण्याचा प्रयत्न करत आहे तर इराण इस्रायलमध्ये कधी नागरी वस्तीवर तर कधी सैन्याशी संबंधित आस्थापनांवर हल्ले करत आहे. इस्रायलने अली खमेनेई यांना ठार मारण्याचा धमकीवजा इशारा दिला आहे. याआधी इस्रायलने इराणच्या अनेक सैन्याधिकाऱ्यांना आणि गुप्तचर अधिकाऱ्यांना ठार केले आहे.
इस्रायलने १७ - १८ जूनच्या रात्री इराणची राजधानी असलेल्या तेहरान तसेच इराणच्या लष्करीदृष्ट्या महत्त्वाच्या असलेल्या आस्थापनांना आणि सैन्य तळांना लक्ष्य करुन मोठ्या प्रमाणात हवाई हल्ले केले. या हल्ल्यांमुळे इराणमध्ये मोठ्या प्रमाणात जीवितहानी आणि वित्तहानी झाल्याचा अंदाज व्यक्त होत आहे. यानंतर ट्रुथ या सोशल मीडियावर डोनाल्ड ट्रम्प यांनी एक नवी पोस्ट टाकली आहे. यात 'unconditional surrender' अर्थात 'बिनशर्त शरणागती' असे दोनच शब्द नमूद आहेत. ही पोस्ट इराणला उद्देशून करण्यात आली आहे. इराणचे सर्वोच्च नेते अली खमेनेई (Ali Khamenei) यांना जीवंत राहायचे असल्यास इराणने बिनशर्त शरणागती मागावी, अशा स्वरुपाची ही पोस्ट असल्याचे आंतरराष्ट्रीय राजकारणाच्या अभ्यासकांचे म्हणणे आहे. या पार्श्वभूमीवर इराणचे सर्वोच्च नेते अली खमेनेई (Ali Khamenei) यांनी टीव्हीवरुन देशाला उद्देशून केलेल्या भाषणात शरण येणार नाही, असे जाहीर केले.
इस्रायलने इराणवर हल्ला करुन स्वतःची कबर खोदली आहे. त्यांना भयानक परिणामांना सामोरे जावे लागेल. अमेरिकेने इराणवर हला केला तर त्यांनाही भयानक परिणामांना सामोरे जावे लागेल; असे इराणचे सर्वोच्च नेते अली खमेनेई (Ali Khamenei) यांनी टीव्हीवरुन देशाला उद्देशून केलेल्या भाषणात जाहीर केले.
अमेरिकेच्या युद्धनौका इस्रायलच्या सीमेजवळ
इराणच्या क्षेपणास्त्र हल्ल्यांपासून इस्रायलचे रक्षण करण्यासाठी यूएसएस द सुलिव्हन्स आणि यूएसएस आर्ले बर्क या अमेरिकेच्या युद्धनौका इस्रायलच्या सीमेजवळ समुद्रात तैनात आहेत. इस्रायलच्या विमानांना हवेतच इंधन पुरवठा करण्यासाठी अमेरिकेच्या इंधन वाहक विमानांचे पथक आखाती देशांमध्ये सज्ज आहे. अमेरिकेच्या सैन्याने सुरू केलेल्या हालचालींमुळे इराण - इस्रायल संघर्ष आणखी चिघळण्याची शक्यता व्यक्त होत आहे.