पालघर: आषाढी एकादशीनिमित्त विठ्ठल रुक्मिणीच्या दर्शनासाठी पंढरपूरला जाण्याकरिता एसटी प्रशासनाकडून राज्यात सर्वत्र विशेष व्यवस्था करण्यात आली आहे. पालघर जिल्ह्यातील आठ आगारांमधून सुद्धा ५५ बस पंढरपूर यात्रेसाठी जाणाऱ्या भाविकांसाठी उपलब्ध करून देण्यात आल्या आहेत. आषाढी यात्रेनिमित्त पंढरपूरला श्री विठ्ठल रुक्मिणीच्या दर्शनासाठी पालघर जिल्ह्यातील नागरिकांना भाविकांना सुलभतेने पंढरपूरला जाता यावे याकरिता पालघर विभागाच्या आठही आगारातून विशेष ५५ बसेस पंढरपूरला सोडण्यासाठीचे नियोजन करण्यात आले आहे.
एखाद्या गाव वाड्यातून एकत्रित बुकिंग असेल तर थेट गावातूनच पंढरपूरला बस सोडण्यात येणार आहेत. ६ जुलै रोजी राज्यात सर्वत्र साजऱ्या होणाऱ्या आषाढी एकादशी निमित्त भाविक मोठ्या संख्येने पंढरपूर येथे दर्शनाकरिता जात असतात. पंढरपूरला जाण्याकरिता एसटी प्रशासनाकडून दरवर्षी जादा बसेसची सोय उपलब्ध करून देण्यात येते.
पालघर जिल्ह्यातील पालघर, सफाळा, वसई, अर्नाळा, डहाणू, जव्हार, बोईसर व नालासोपारा या आगारांमधून पंढरपूरकरिता बसचे नियोजन करण्यात आले आहे. एसटी बसमध्ये महिला, वयोवृद्ध व अपंग यांना सवलतीच्या दरात तिकीट आकारण्यात येणार आहे.