गणेशोत्सवात प्रतिकृतीची प्रतिष्ठापना; उत्सवासाठी मूर्ती सुपूर्द
पुणे : ‘मंगलमूर्ती मोरया…’च्या जयघोषासह ‘श्रीमंत दगडूशेठ हलवाई गणपती की जय…’चे स्वर आता थेट बेल्जियममध्ये निनादणार आहेत. महाराष्ट्र मंडळ बेल्जियम आणि शिरीष वाघमारे यांच्या पुढाकाराने बेल्जियममध्ये दरवर्षी साजरा होत असलेल्या गणेशोत्सवात यंदा प्रथमच श्रीमंत दगडूशेठ हलवाई गणपतीच्या प्रतिकृतीची प्रतिष्ठापना करण्यात येणार आहे. या मूर्तीचे पुण्यातील मंदिरात विधीवत पूजन करून नुकतीच ती महाराष्ट्र मंडळ बेल्जियमच्या सदस्यांकडे ट्रस्टतर्फे सुपूर्द करण्यात आली. उपक्रमाचे संयोजक शिरीष वाघमारे, तृप्ती वाघमारे, ट्रस्टचे कोषाध्यक्ष महेश सूर्यवंशी, राजाभाऊ पायमोडे, रोहित लोंढे उपस्थित होते.
गणरायाची अडीच फूट उंचीची ही प्रतिकृती पुण्यातील सुभाषनगर येथील श्री नटराज आर्ट्सचे भालचंद्र ऊर्फ लाला देशमुख आणि राजेंद्र देशमुख यांनी साकारली आहे. ट्रस्टच्या वतीने आयोजित कार्यक्रमात शिरीष वाघमारे, तृप्ती वाघमारे यांच्यासह इतर सदस्यांनी ही मूर्ती स्वीकारली. १७५ देशांमध्ये गणेशोत्सव साजरा होत असून यानिमित्ताने बेल्जियममधील भारतीयांचा उत्साह वाखाणण्यासारखा आहे. शिरीष वाघमारे म्हणाले, ‘श्रीमंत दगडूशेठ हलवाई गणपतीच्या प्रतिकृतीचे बेल्जियममध्ये आगमन हा महाराष्ट्र मंडळ बेल्जियमसाठी अभिमानाचा क्षण आहे.
‘आता विश्वात्मके देवे’ची येणार प्रचिती
गणरायाची बेल्जियममधील स्थापना ही आमच्यासाठी श्रद्धा, परंपरा आणि एकतेचे प्रतीक ठरणार असल्याचे सांगत महेश सूर्यवंशी पुढे म्हणाले की, ‘गणरायाची मूर्ती बेल्जियममध्ये जात असल्याने ‘आता विश्वात्मके देवे’, हे संतश्रेष्ठ ज्ञानेश्वर माउलींचा पसायदानामधील श्लोक हा खऱ्या अर्थाने साध्य होत आहे. श्रीमंत दगडूशेठ हलवाई गणपती हे जगभरातील गणेशभक्तांचे श्रद्धास्थान आहे. बेल्जियममधील गणेशभक्तांची अपार श्रद्धा श्रीमंत दगडूशेठ हलवाई गणपतीवर असल्याने गणरायाची मूर्ती त्यांना देण्यात आली आहे. जवळपास अडीच हजार मराठी बांधव त्या ठिकाणी सक्रिय आहेत. तसेच २० ते २५ हजार भारतीय नागरिक उत्सवात सहभागी होतात. लोकमान्य टिळकांची समाज एकसंध होण्याची भावना, भारतासह परदेशातदेखील घडत आहे, याचा आनंद आहे.