मुंबई : गणेशोत्सव जवळ येत असताना संपूर्ण मुंबईत बाप्पाच्या आगमनाची लगबग सुरू झाली आहे. याच पार्श्वभूमीवर बृहन्मुंबई महानगरपालिका (BMC) संलग्न महिला बचत गटांनी (SHGs) एक अनोखा आणि अभिनव उपक्रम हाती घेतला आहे. महिलांना उद्योजकतेची नवी संधी मिळावी आणि मुंबईकरांना अस्सल घरगुती चवीचे मोदक मिळावेत यासाठी ‘मोदक महोत्सव २०२५’ आयोजित करण्यात आला आहे. या उपक्रमांतर्गत महिला बचत गट स्वतःच्या हाताने पारंपारिक उकडीचे मोदक तसेच तळलेले मोदक बनवून ते थेट मुंबईकरांच्या दारापर्यंत पोचवणार आहेत. यामुळे भक्तांना बाप्पाला नैवेद्य अर्पण करण्यासाठी आणि कुटुंबासह प्रसादाचा आस्वाद घेण्यासाठी ताजे, घरगुती व चविष्ट मोदक सहज मिळणार आहेत. बीएमसीचा हा उपक्रम महिलांना आर्थिक बळ देणारा तर ठरणारच, पण त्याचबरोबर मुंबईकरांसाठी गणेशोत्सव अधिक गोड आणि खास बनवणार आहे.
बृहन्मुंबई महानगरपालिका (BMC) अनेक वर्षांपासून महिला बचत गटांना (Self Help Groups) आर्थिकदृष्ट्या सक्षम बनवण्यासाठी विविध योजना राबवत आहे. महिलांच्या या सबलीकरणाचा एक अभिनव टप्पा म्हणजे यंदाचा ‘मोदक महोत्सव २०२५’ होय. या उपक्रमामुळे बचत गटातील महिलांना आपल्या पाककौशल्याचा उपयोग करून व्यवसाय करण्याची मोठी संधी मिळाली आहे. गणेशोत्सवात मोदकांची मागणी नेहमीच प्रचंड असते. हाच फायदा महिलांच्या उद्योजकतेला मिळावा म्हणून बीएमसीने या विशेष उपक्रमाची आखणी केली आहे. याअंतर्गत महिला बचत गट फक्त मोदकच नव्हे तर विविध सण-उत्सवांसाठी लागणारे गोडधोड पदार्थ तसेच इतर खाद्यपदार्थ तयार करून घरपोच सेवा देतात. यामुळे मुंबईकरांना दर्जेदार, घरगुती चवीचे पदार्थ मिळतातच; पण त्याचबरोबर या महिलांना उत्पन्नाचा शाश्वत स्त्रोत उपलब्ध होतो आणि त्यांच्या कुटुंबाच्या आर्थिक स्थैर्याला हातभार लागतो.
घरबसल्या मोदकासाठी ऑर्डर कशी नोंदवाल?
यंदाच्या ‘मोदक महोत्सव २०२५’ मध्ये पारंपारिक उकडीचे आणि तळलेले मोदक यांना विशेष स्थान देण्यात आले आहे. हे मोदक थेट महिला बचतगटातील महिलांच्या हातांनी तयार होणार आहेत. चव आणि दर्जा याबाबत ग्राहकांना खात्री मिळावी यासाठी प्रत्येक मोदक काळजीपूर्वक बनवला जाणार आहे. मुंबईकरांना मोदक सहज उपलब्ध व्हावेत यासाठी २१ ते २५ ऑगस्ट २०२५ या कालावधीत ऑनलाइन ऑर्डर नोंदवण्याची सोय उपलब्ध करून देण्यात आली आहे. ग्राहकांनी https://shgeshop.com या अधिकृत वेबसाइटवर जाऊन मोदकांसाठी ऑर्डर द्यावी लागेल. विशेष म्हणजे, या महोत्सवातील मोदकांसाठी डिलिव्हरी शुल्क आकारले जाणार नाही. सर्व ऑर्डरची होम डिलिव्हरी २७ ऑगस्ट २०२५ रोजी केली जाणार आहे, जेणेकरून गणरायाच्या आगमनाआधीच घराघरांत गोड मोदक पोहोचतील आणि बाप्पाच्या स्वागताला खास गोडवा लाभेल.
घरगुती मोदक आता थेट बचतगटांकडून
गणेशोत्सवात पारंपरिक मोदक बनवणे ही एक कला असून त्यासाठी भरपूर वेळ आणि कौशल्य लागते. आजच्या धावपळीच्या जीवनशैलीत अनेकांना स्वतःहून उकडीचे मोदक बनवणे शक्य होत नाही. अशा वेळी महिला बचत गटांनी घरगुती पद्धतीने तयार केलेले स्वादिष्ट मोदक सहज उपलब्ध करून दिल्यामुळे गणेशोत्सवाचा पारंपरिक गोडवा टिकून राहणार आहे. या उपक्रमामुळे एकीकडे मुंबईकरांना अस्सल मोदकांचा आस्वाद घेता येणार असून दुसरीकडे महिलांना आर्थिक स्वातंत्र्य व रोजगाराची संधी मिळणार आहे. बृहन्मुंबई महानगरपालिकेचा हा उपक्रम फक्त खाद्यपदार्थ उपलब्ध करून देणारा नाही, तर समाजाला एकत्र आणणारा आणि महिलांना सक्षम बनवणारा एक यशस्वी प्रयत्न ठरेल अशी आशा व्यक्त केली जात आहे.