शनिवारी रात्री चिपळूण तालुक्यात पूल दुर्घटना घडली. चिपळूण तालुक्यातील खडपोली एमआयडीसीकडे जाणारा महत्वाचा पूल कोसळला आहे. शनिवारी रात्री उशिरा ही घटना घडली असून 1965 च्या सुमारास हा ब्रीज बांधण्यात आला होता. हा पूल जीर्ण झाल्याने कोसळल्याचा अंदाज आहे.
हा ब्रिज नवीन बांधण्यासाठी प्रस्ताव एमआयडीसीकडे देण्यात आल्याची माहिती चिपळूण तालुका प्रशासनाकडून देण्यात आली आहे. दरम्यान रत्नागिरी जिल्ह्याचे पालकमंत्री उदय सामंत आज चिपळूणमध्ये येणार असून पुलाची पाहणी करणार आहेत.
घटना घडल्यानंतर मंत्री उदय सामंत यांनी रात्री सर्व माहिती घेऊन प्रशासनाला सूचना केली आहे. खडपोली, गाणे आदी गावांकडे जाणारी वाहतूक अन्य मार्गाने वळवण्यात आली असून पर्यायी मार्गावरून अवजड वाहने वाहतूक करू शकत नाहीत. पिंपळी-खडपोली-दसपटी या मार्गांवरील वाहतूक बंद करण्यात आली आहे. हा ब्रीज कोसळला तेव्हा दैव बलवत्तर म्हणून या पुलावर कोणीही नव्हते त्यामुळे मोठा अनर्थ टळला आहे.
मुसळधार पाऊस सुरू होता गुरुवारपासून पावसाचा जोर ओसरला आहे. मात्र शनिवारी दिवसभर हलक्या ते मध्यम स्वरूपाचा पाऊस सुरू होता. याचा फटका सगळ्यात जुन्या असलेल्या खडपोली एमआयडीसी व काही गावांकडे जाणाऱ्या मोठ्या पुलाला बसला.
1965 साली हा ब्रिज बांधण्यात आला होता. हा ब्रिज तब्बल 60 वर्षे जुना झाला होता. त्यामुळे हा ब्रिज कमकुवत झाला होता. याया सगळ्या दुर्घटनेची गंभीर दखल चिपळूणचे आमदार शेखर निकम यांनी घेतली असून त्यांनी प्रशासनाला योग्य त्या सूचना दिल्या आहेत.