मॉस्को : कर्करोग म्हणजे कॅन्सर. कॅन्सर हा आजार झाला की रुग्ण आणि त्याचे नातलग निराश होतात. हे नैराश्यच अनेकदा रुग्णाच्या मृत्यूचे मुख्य कारण असते, असे डॉक्टर सांगतात. कारण कॅन्सरवर केमो थेरपी आणि इतर औषधांनी उपचार करतेवेळी शरीरावर अनेक साईड इफेक्ट अर्थात प्रतिकूल परिणाम होतात. या त्रासातून बरे होण्यास अनेकदा काही आठवडे किंवा काही महिन्यांचा कालावधी लागतो. तोपर्यंतचा कालावधी हा अनेकदा जीवघेणा असतो. हा त्रासच रुग्ण आणि त्याच्या नातलगांना जास्त निराश करतो. पण या समस्येवर उपाय सापडला आहे. रशियात झालेल्या संशोधनामुळे नवी आशा निर्माण झाली आहे.
रशियाने कर्करोगाला प्रतिबंध करणारी लस अर्थात कॅन्सरला प्रतिबंध करणारी लस विकसित केल्याचे जाहीर केले आहे. या लसचे रुग्णांवरील प्रयोग सुरू आहेत. प्रीक्लिनिकल ट्रायल यशस्वी झाली असून पुढील टप्प्याचे प्रयोग सुरू आहेत. आतापर्यंतच्या प्रयोगांमध्ये ट्युमरचा आकार ६० ते ८० टक्क्यांनी कमी करण्यात लस यशस्वी झाली आहे. यामुळे इतर औषधांच्या मदतीने रुग्णाला बरे करणे शक्य होत आहे.
रशियाची लस mRNA तंत्राद्वारे विकसित केली आहे. यात प्रत्येक रुग्णाच्या शरीरातून आधी RNA अर्थात रिबोन्यूक्लिक आम्ल घेतले जाते. या रिबोन्यूक्लिक आम्लाच्या मदतीने संबंधित रुग्णासाठी लस विकसित केली जाते. यामुळे संबंधित रुग्णाच्या शरीरात पसरत असलेल्या कॅन्सरला प्रतिबंध करणारी लस विकसित करणे सोपे होते. लस कमालीची प्रभावी ठरते. कोलोन कॅन्सर, ब्रेन कॅन्सर ग्लियोब्लास्टोमा, स्किन कॅन्सर मेलेनोमा या आजारांवर रशियाची लस प्रभावी असल्याचे आढळले आहे. सध्या या लसची किंमत तीन लाख रुबल म्हणजेच अडीच लाख रुपये एवढी आहे. रशिया सरकार कॅन्सर रुग्णांना लस विनामूल्य देण्याबाबत विचार करत आहे.
कॅन्सरला हरवणाऱ्या रशियाच्या लसचे पहिल्या टप्प्याचे ह्युमन ट्रायल सप्टेंबर - ऑक्टोबर २०२५ पासून सुरू होणार आहे. या प्रयोगाकडे भारतासह अनेक देशांचे लक्ष आहे.