नवी दिल्ली : अमेरिकेचे राष्ट्राध्यक्ष डोनाल्ड ट्रम्प यांनी मंगळवारी संध्याकाळी उशिरा पंतप्रधान नरेंद्र मोदी यांच्याशी बातचीत केली. या दरम्यान, अमेरिकन राष्ट्रपतींनी पंतप्रधान मोदींच्या ७५व्या वाढदिवसानिमित्त शुभेच्छा दिल्या तसेच त्यांच्या नेतृत्वक्षमतेचे कौतुकही केले. दोन्ही नेत्यांमध्ये यावेळी भारत-अमेरिका संबंध आणि काही जागतिक मुद्द्यांवर चर्चा झाली.
राष्ट्रपती ट्रम्प यांनी सोशल मीडियावर पंतप्रधान नरेंद्र मोदी यांच्याशी झालेली बातचीत सादर केली. माझे मित्र पंतप्रधान नरेंद्र मोदी यांच्या सोबत शानदार फोन कॉल झाला. मी त्यांना वाढदिवसाच्या शुभेच्छा दिल्या. ते अद्भुत काम करत आहेत. नरेंद्र रशिया आणि युक्रेन यांच्यातील युद्ध संपवण्यासाठी तुम्ही दिलेल्या समर्थनासाठी धन्यवाद.
पंतप्रधान मोदींनी आपल्या पोस्टमध्ये राष्ट्राध्यक्ष ट्रम्प यांचे आभार मानले आणि त्यांना 'माझा मित्र' असे संबोधले. त्यांनी लिहिले की, 'माझ्या ७५व्या वाढदिवसाच्या निमित्ताने तुमच्या फोन कॉल आणि हार्दिक शुभेच्छांसाठी धन्यवाद, माझे मित्र राष्ट्राध्यक्ष ट्रम्प.'
या चर्चेदरम्यान दोन्ही नेत्यांनी भारत आणि अमेरिकेची व्यापक आणि जागतिक भागीदारी नवीन उंचीवर नेण्याची आपली बांधिलकी व्यक्त केली. तसेच, युक्रेन संघर्षावर शांततापूर्ण तोडगा काढण्याच्या ट्रम्प यांच्या प्रयत्नांना भारताचा पाठिंबा असल्याचेही मोदींनी सांगितले.
हा फोन कॉल अशा वेळी झाला आहे, जेव्हा भारत आणि अमेरिकेदरम्यान व्यापार करारावर पुन्हा चर्चा सुरू झाली आहे. मंगळवारी दोन्ही देशांच्या प्रतिनिधींच्या भेटीही झाल्या होत्या. या फोन कॉलमुळे दोन्ही देशांमधील संबंध अधिक दृढ होण्याची शक्यता आहे.