पुणे : कोथरुडमधील गोळीबार प्रकरणात पोलिसांनी गुंड निलेश घायवळ विरोधात मकोका अंतर्गत गुन्हा नोंदवला. पण पोलीस कारवाई होण्याआधीच निलेश घायवळ फरार झाला. तो परदेशात असल्याचे वृत्त आहे. घायवळ फरार झाल्याचे कळल्यानंतर पोलिसांनी घायवळच्या पुण्यातील घरावर धाड टाकली. या कारवाईत पोलिसांच्या हाती मोठे घबाड आले आहे. संघटीत गुन्हेगारीला आळा घालण्यासाठी पोलिसांनी घायवळविरुद्ध सर्व आघाड्यांवर कारवाईचा फास आवळला आहे.
पुणे पोलिसांच्या विशेष पथकाने निलेश घायवळच्या कोथरुडसह पुण्यातील विविध ठिकाणांवरील घरांवर धाड टाकली आहे. या कारवाईत पोलिसांनी बंदुकीच्या जिवंत गोळ्या, रिकाम्या पुंगळ्या, अनेक महत्त्वाची कागदपत्रे यांची जप्ती केली. जप्त केलेल्या कागदपत्रांमध्ये घायवळच्या मालकीच्या मालमत्तांचे सातबारे, साठेखत, तसेच मराठवाड्यातील पवनचक्की प्रकल्पाशी संबंधित फाइल्स सापडल्या आहेत. पोलिसांनी घायवळच्या बेकायदेशीर बांधकामे आणि मालमत्तांविरोधात कारवाईसाठी पुणे महानगरपालिकेला अधिकृत पत्र पाठवले आहे. महापालिका प्रशासनाने कारवाईसाठी आवश्यक ती कायदेशीर तयारी सुरू केली आहे. अनधिकृत मालमत्ता आणि थकीत कर असलेल्या संपत्तीवर सील आणि जप्तीची प्रक्रिया हाती घेतली जाणार आहे.
आतापर्यंतच्या तपासातून हाती आलेल्या माहितीनुसार निलेश घायवळने बनावट कागदपत्रांच्या आधारे पासपोर्ट मिळवून विदेशात पलायन केले आहे. पुणे पोलिसांनी घायवळचा पासपोर्ट रद्द करण्याची प्रक्रिया सुरू केली आहे. तसेच घायवळच्या नावावरील बँक खाती गोठवण्याचे आणि बेकायदा मालमत्ता जप्त करण्याचे आदेश दिले आहेत.
कोथरुड गोळीबारानंतर घायवळ विरोधात पोलिसांनी कठोर कारवाई सुरू केली आहे. पोलिसांच्या या आक्रमक भूमिकेमुळे पुण्यातील संघटीत पोलिसांच्या या आक्रमक भूमिकेमुळे गुन्हेगारीविरोधात कारवाई आणखी तीव्र होण्याची शक्यता आहे. पोलिसांनी विना परवाना शस्त्रास्त्र बाळगणे, गोळीबारासाठी जिवंत गोळ्यांचा साठा बाळगणे या प्रकरणात निलेश घायवळ विरोधात गुन्हा नोंदवला आहे. घायवळ विरोधात कलम १०९, ३५१, ३५२, १८९(१), १८९(२), १९०, १९१, २११, ११३(५) तसेच शस्त्रास्त्र कायदा कलम ३(२५), ३७(१)(३), १३५ व महासुरक्षा कायदा कलम ३(१), ३(२) अंतर्गत गुन्हा दाखल करण्यात आला आहे.