नाशिक: सिंहस्थ महाकुंभ हा केवळ धार्मिक उत्सव नसून आपल्या समृद्ध सांस्कृतिक परंपरेची प्राणशक्ती आणि सामाजिक ऐक्याची अखंड ताकद आहे. या महाकुंभाच्या माध्यमातून महाराष्ट्राच्या आणि हिंदू संस्कृतीच्या समृद्ध सांस्कृतिक विविधतेचे दर्शन संपूर्ण जगाला घडणार असून, जागतिक पटलावर आपल्या संस्कृतीचा ठसा उमटणार आहे, असे प्रतिपादन उपमुख्यमंत्री एकनाथ शिंदे यांनी केले. राष्ट्रपती द्रौपदी मुर्मू यांच्या हस्ते आज नाशिक येथील रामतीर्थ आणि त्र्यंबकेश्वर येथील पवित्र कुशावर्त तीर्थावर सिंहस्थ कुंभमेळ्यानिमित्त ध्वजारोहण व ध्वजपूजन सोहळा अत्यंत धार्मिक व मंगलमय वातावरणात संपन्न झाला. सायंकाळी रामतीर्थावर राष्ट्रपतींच्या प्रमुख उपस्थितीत झालेल्या विविध कार्यक्रमात आणि गोदा महाआरतीच्या सोहळ्यात स्वागतपर भाषण करताना उपमुख्यमंत्री बोलत होते.
नारीशक्तीचा सर्वोच्च सन्मान व ऐतिहासिक क्षण
उपमुख्यमंत्री शिंदे म्हणाले की, राष्ट्रपती द्रौपदी मुर्मू यांच्या हस्ते धर्मध्वजारोहण होणे हा सिंहस्थ महाकुंभाच्या इतिहासातील सुवर्णक्षण आहे. एका तपस्वी मातृशक्तीच्या हस्ते या पवित्र धर्मध्वजाचे ध्वजारोहण होणे हा ऐतिहासिक योग असून सनातन परंपरेतील आदिशक्तीचा आणि भारताच्या संपूर्ण नारीशक्तीचा हा सर्वोच्च सन्मान आहे. शतकानुशतकांच्या परंपरेत आज नवा इतिहास घडला आहे. पंतप्रधान नरेंद्र मोदी यांनी मांडलेल्या 'एक भारत, श्रेष्ठ भारत' या संकल्पनेचे मूर्त स्वरूप या महाकुंभाच्या माध्यमातून पाहायला मिळत आहे. आज एकाच वेळी रामकुंडावर आणि कुशावर्त तीर्थावर धर्मध्वज फडकविण्यात आला असून कोजागिरी पौर्णिमेला गोदातीरी झालेला सामूहिक शंखनाद गिनीज बुक ऑफ वर्ल्ड रेकॉर्ड्समध्ये नोंदवला गेला आहे.
नाशिकमध्ये 12 वर्षानंतर कुंभमेळ्याचं पर्व सुरू होणार आहे. ज्योतिषशास्त्रानुसार, गुरू ग्रहाने सिंह राशीत प्रवेश केल्यानंतर या पर्वाला सुरुवात होते. 31 ...
35,000 कोटी रुपयांची विकासकामे आणि रोजगार निर्मिती
या सिंहस्थ महाकुंभाच्या पर्वकाळात जगभरातून सुमारे 12 कोटी भाविक, साधू-संत आणि यात्रेकरू नाशिक-त्र्यंबकेश्वर येथे दाखल होणार आहेत. या जनसागराच्या स्वागतासाठी आणि सेवेसाठी महाराष्ट्र शासन पूर्णपणे सज्ज झाले आहे. या परिसरात सुमारे 35,000 कोटी रुपयांची विकासकामे प्रगतिपथावर असून, यामुळे नाशिक व त्र्यंबकेश्वरच्या नागरिकांच्या भविष्यातील विकासाचा भक्कम पाया उभा राहत आहे. हा महोत्सव सामान्य कष्टकरी माणसाचाही असावा, ज्यामुळे स्थानिकांना रोजगाराच्या संधी मिळतील आणि अर्थव्यवस्थेला चालना मिळेल. सिंहस्थ महाकुंभ हा स्वच्छता, पर्यावरण संवर्धन आणि सामाजिक एकात्मतेचा आदर्श निर्माण ठरावा, असा विश्वास त्यांनी व्यक्त केला.