नाशिक : नाशिक-त्र्यंबकेश्वर सिंहस्थ कुंभमेळा २०२७ च्या पूर्वतयारी आणि धार्मिक आयोजनांचा शुभारंभ राष्ट्रपती द्रौपदी मुर्मू यांच्या प्रमुख उपस्थितीत मोठ्या उत्साहात पार पडला. यावेळी राष्ट्रपतींनी गोदावरी नदीच्या पवित्र तीरावर आयोजित भव्य सोहळ्याला संबोधित केले आणि त्यानंतर विधीवत गोदावरी मातेची महाआरती केली. "नाशिक-त्र्यंबकेश्वर सिंहस्थ कुंभाची परंपरा जेवढी प्राचीन आहे, तेवढीच ती समृद्ध आहे. शतकानुशतके आयोजित होणारा कुंभमेळा हा भारताची सांस्कृतिक-आध्यात्मिक एकता आणि सातत्याचे जिवंत प्रतीक आहे," असे गौरवोद्गार राष्ट्रपतींनी यावेळी काढले.
प्राचीन वारसा आणि युवा पिढीचा संगम
आपल्या भाषणात राष्ट्रपती म्हणाल्या की, हरिद्वारचा गंगाकिनारा, प्रयागराजचा त्रिवेणी संगम, उज्जैनची क्षिप्रा नदी आणि नाशिकचा गोदावरी तीर येथे आयोजित होणारे कुंभमेळे जगभरात प्रसिद्ध आहेत. या सोहळ्यांमध्ये शतकांपासून एकत्र येणारे लाखो भाविक भारताची सामाजिक समरसता दर्शवतात. सिंहस्थ कुंभ-२०२७ हा भारताचा प्राचीन वारसा आधुनिकतेशी जोडणारा ठरेल आणि युवा पिढीला देशाची महान संस्कृती व मूल्यांची ओळख करून देईल, असा विश्वास त्यांनी व्यक्त केला.
महाराष्ट्र ही संत, शूरवीर आणि समाजसुधारकांची भूमी
महाराष्ट्राच्या ऐतिहासिक आणि आध्यात्मिक वैभवाचा उल्लेख करताना राष्ट्रपती म्हणाल्या, प्रभू श्रीरामांनी नाशिकच्या भूमीत वनवासकाळ घालवला, तर त्र्यंबकेश्वर ज्योतिर्लिंगाचे दर्शन ही महादेवाची विशेष कृपा आहे. छत्रपती शिवाजी महाराजांचे शौर्य, वीर सावरकरांची जन्मभूमी आणि अभिनव भारत केंद्र, चापेकर बंधू तसेच अनंत कान्हेरे यांच्यासारख्या क्रांतिकारकांचे बलिदान देशप्रेमाची ऊर्जा देते. संत ज्ञानेश्वर, संत एकनाथ, संत तुकाराम यांच्यासह महात्मा ज्योतिराव फुले आणि डॉ. बाबासाहेब आंबेडकर यांनी समाजाला समतेचा आणि बंधुभावाचा संदेश दिला. महिला शिक्षण आणि वंचित घटकांच्या उत्थानात महाराष्ट्राने देशाला दिशा दाखवली आहे.
विशेष म्हणजे, गोदावरी महाआरतीसाठी नाशिकमधील ६०० ते ६५० गावांमधून हजारो आदिवासी बांधव मोठ्या संख्येने उपस्थित होते. या सामूहिक सहभागाचे राष्ट्रपतींनी विशेष कौतुक केले. याशिवाय, देशाच्या एकूण औद्योगिक उत्पादनात महाराष्ट्राचा वाटा सुमारे १५ टक्के असल्याचे सांगत त्यांनी राज्याच्या आर्थिक योगदानाची प्रशंसा केली; तसेच हवामान बदल आणि दुष्काळग्रस्त शेतकऱ्यांच्या अडचणींवरही लक्ष वेधले.
नाशिक : प्रभू श्रीरामांच्या पदस्पर्शाने पावन झालेल्या नाशिकच्या गोदातीरावर आज सिंहस्थ कुंभपर्व २०२६-२०२८ चा अधिकृत आणि मंगलमय शुभारंभ झाला. ...
कुंभमेळा म्हणजे सनातन संस्कृती आणि समरसतेचा संगम: मुख्यमंत्री देवेंद्र फडणवीस
मुख्यमंत्री देवेंद्र फडणवीस यांनी आपल्या संबोधनात सांगितले की, सनातन संस्कृती शाश्वत असून कुंभ हे तिचे असे रूप आहे, जिथे विविध पंथ, संप्रदाय आणि उपासना पद्धती एकत्र येतात. ६०० गावांतील सुमारे ६,००० आदिवासी बांधवांची उपस्थिती हीच सनातन संस्कृतीची खरी ओळख आहे. नाशिक आणि त्र्यंबकेश्वरमध्ये मोठ्या प्रमाणावर पायाभूत सुविधांची कामे सुरू आहेत. चालू कामांपैकी सुमारे ८५ टक्के कामे अशी आहेत, ज्यांचा लाभ पुढील २५ वर्षे स्थानिक नागरिकांना आणि भाविकांना सातत्याने मिळत राहील.
कुंभमेळ्याचा नवा सुवर्ण अध्याय: उपमुख्यमंत्री एकनाथ शिंदे
उपमुख्यमंत्री एकनाथ शिंदे यांनी या प्रसंगाला ऐतिहासिक ठरवत म्हटले की, सिंहस्थ कुंभाच्या इतिहासात आज एक सुवर्ण अध्याय जोडला गेला आहे. धर्मध्वजारोहण हे नारीशक्ती आणि सनातन परंपरेच्या सन्मानाचे प्रतीक आहे. सिंहस्थ कुंभमेळ्यासाठी सुमारे ३२ हजार कोटी रुपयांची विविध विकासकामे केली जात आहेत. आगामी कुंभमेळ्यात देश-विदेशातून १० ते १५ कोटी भाविक आणि साधू-संत नाशिकमध्ये दाखल होण्याचा अंदाज आहे. हा सोहळा केवळ धार्मिक नसून रोजगार, स्वच्छता, पर्यावरण आणि आर्थिक विकासाला गती देणारा ठरेल.
कार्यक्रमादरम्यान मुख्यमंत्र्यांनी मंगल कलश भेट देऊन राष्ट्रपतींचे स्वागत केले. याच मंचावरून सिंहस्थ कुंभमेळ्याचे अधिकृत गीत आणि अधिकृत संकेतस्थळाचे लोकार्पण करण्यात आले. कार्यक्रमाची सांगता राष्ट्रपतींच्या हस्ते झालेल्या भावपूर्ण गोदावरी महाआरती आणि पूजनाने झाली.