पगार थकला; आमदार संजय केळकर यांच्याकडे तक्रारी
ठाणे : ठाणे शहरात ४० ठिकाणी सुरू करण्यात आलेला 'आपला दवाखाना' हा उपक्रम बंद पडला आहे. संबंधित कंत्राटदार कंपनीने येथील कार्यरत परिचारिकांचे पगार थकवल्याच्या तक्रारी खोपट येथील भाजप कार्यालयात 'जनसेवकाचा जनसंवाद' या कार्यक्रमात आमदार संजय केळकर यांच्याकडे करत न्यायाची मागणी केली आहे. हे दवाखाने बंद पडल्याने त्याचा ताबा इतर व्यवसायिकांनी घेत त्याचा अन्य 'उद्योग' धंद्यांसाठी होत असल्याचीदेखील चर्चा आहे. शहरात ४० ठिकाणी सुरू असलेल्या या दवाखान्यांमध्ये काम करणारे कर्मचारी आणि परिचारिका बेरोजगार झाले असून त्यांचा सहा महिन्यांचा पगारदेखील थकला आहे. तो मिळवून देण्याची मागणी कर्मचाऱ्यांनी आ.केळकर यांच्याकडे निवेदन देऊन केली. यावेळी माजी उप महापौर अशोक भोईर, माजी नगरसेवक भरत चव्हाण, राजेश गाडे आदी उपस्थित होते.
याबाबत बोलताना संजय केळकर यांनी सांगितले की, आपला दवाखाना हा उपक्रम राबवण्यासाठी ठाणे महापालिकेने बंगळुरु येथील मेडको नावाच्या कंपनीला कंत्राट दिले होते. ऑक्टोबरपर्यंत या कंपनीकडे कंत्राट होते, मात्र ऑगस्टमध्येच हे दवाखाने बंद पडले. तत्पूर्वी मागील सहा महिन्यांचा पगारदेखील कंपनीने कर्मचाऱ्यांना दिला नाही. कर्मचाऱ्यांची दिवाळीदेखील कोरडी गेली. या कंपनीला ५६ लाखांचा दंड ठोठावण्यात आल्याचे प्रशासनाचे म्हणणे असले तरी ही कंपनी पालिकेला दाद देत नाही. त्यामुळे पालिकेने कंपनीकडून सर्व दंड वसूल करून कर्मचाऱ्यांचे रखडलेले पगार द्यावेत आणि संबंधित कंपनीला काळ्या यादीत टाकावे'', अशी मागणी केळकर यांनी केली. ही बाब अत्यंत गंभीर असून प्रशासनाने तातडीने कारवाई करावी अन्यथा या कर्मचाऱ्यांचा पालिका मुख्यालयावर धडक मोर्चा काढण्यात येईल, असा इशाराही आ. केळकर यांनी दिला आहे.
''एखादा उपक्रम सुरू करायचा, तो बंद पडला की दुसरा उपक्रम सुरू करायचा. पालिका म्हणजे प्रयोगशाळा नाही. लोकांना थातुरमातुर सेवा देणारी यंत्रणा नको, सक्षम आरोग्यसेवा देणारी यंत्रणा महापालिकेने उभी करायला हवी'', असे मतही आ. केळकर यांनी मांडले. बंद पडलेल्या दवाखान्यांच्या अनेक ठिकाणी इतर व्यवसाय सुरू झाल्याचे दिसत असून एके ठिकाणी तर साड्यांचे दुकान सुरू झाले आहे. त्यामुळे या जागादेखील गिळंकृत होण्याची भीती व्यक्त होत आहे.