मुंबई : महिला वनडे वर्ल्डकप २०२५ आता अंतिम टप्प्यात पोहोचला असून, क्रिकेट चाहत्यांना उपांत्य फेरीतील रोमांचक सामन्यांची प्रतीक्षा आहे. दुसरा उपांत्य सामना भारत आणि ऑस्ट्रेलिया या बलाढ्य संघांमध्ये ३० ऑक्टोबर रोजी खेळवला जाणार आहे. मात्र, जर हा सामना पावसामुळे पूर्ण होऊ शकला नाही तर काय होईल, असा प्रश्न अनेकांना पडला आहे.
आयसीसीने विश्वचषक २०२५ च्या उपांत्य फेरीतील दोन्ही सामन्यांसाठी राखीव दिवस ठेवला आहे. भारत आणि ऑस्ट्रेलिया यांच्यातील उपांत्य सामन्यासाठी ३१ ऑक्टोबर हा राखीव दिवस असेल.
सामना रद्द झाल्यास काय होईल?
जर ३० ऑक्टोबर रोजी पावसामुळे किंवा इतर कोणत्याही कारणामुळे सामन्यात किमान २० षटकांचा खेळ शक्य झाला नाही, तर तो सामना दुसऱ्या दिवशी म्हणजेच राखीव दिवशी (३१ ऑक्टोबर) हलवला जाईल. राखीव दिवशी सामना जिथे थांबला होता, तिथूनच पुन्हा सुरू होईल. एकदा नाणेफेक झाली की, सामना 'लाईव्ह' मानला जातो.
जर राखीव दिवशीही पाऊस पडला आणि सामना पूर्ण होऊ शकला नाही, तर आयसीसीच्या नियमानुसार, साखळी फेरीत गुणतालिकेत उच्च स्थानी असलेल्या संघाला अंतिम फेरीत प्रवेश मिळेल.
साखळी फेरीतील कामगिरीनुसार, ऑस्ट्रेलियन संघ गुणतालिकेत अव्वल स्थानावर होता, तर भारतीय संघ चौथ्या स्थानावर होता. त्यामुळे, जर दोन्ही दिवसांचा खेळ पावसामुळे पूर्णपणे रद्द झाला, तर ऑस्ट्रेलियाचा संघ थेट अंतिम फेरीत प्रवेश करेल आणि भारतीय संघाचे आव्हान संपुष्टात येईल.
थोडक्यात, भारतीय संघाला अंतिम फेरीत प्रवेश मिळवण्यासाठी कोणत्याही परिस्थितीत हा उपांत्य सामना जिंकावा लागेल. जर तो पावसामुळे रद्द झाला, तर गुण तालिकेतील स्थान निर्णायक ठरेल, ज्यामुळे ऑस्ट्रेलियाला फायदा होईल.