अमेरिका-चीन भेटीआधीच ड्रॅगनची डरकाळी! गरज पडल्यास बळाचा वापर करण्यासही मागेपुढे पाहणार नाही, चीनची अमेरिकेला स्पष्ट धमकी

ट्रम्प यांच्यासोबतच्या भेटीपूर्वी चीनचे राष्ट्राध्यक्ष शी जिनपिंग झाले आक्रमक

बीजिंग: अमेरिकेचे राष्ट्राध्यक्ष डोनाल्ड ट्रम्प यांच्यासोबत होणाऱ्या महत्त्वपूर्ण भेटीपूर्वी चीनने तैवानसंदर्भात अत्यंत कठोर भाषेत आपला संदेश दिला आहे. तैवान हा चीनचा अविभाज्य भाग आहे, या आपल्या जुन्या भूमिकेवर बीजिंगने अधिक आक्रमक पवित्रा घेतलेला स्पष्ट झाला आहे. चीनने स्पष्ट केले आहे की ते शांततेचे समर्थन करतात, परंतु गरज पडल्यास बळाचा वापर करण्यासही मागेपुढे पाहणार नाहीत.

अमेरिकेच्या राष्ट्राध्यक्षांसोबत भेट

अमेरिकेचे राष्ट्राध्यक्ष डोनाल्ड ट्रम्प आणि चीनचे राष्ट्राध्यक्ष शी जिनपिंग गुरुवारी भेटणार आहेत. या भेटीपूर्वी चीनने तैवानबाबतचे आपले धोरण अधिक कठोर केल्यामुळे अमेरिका आणि तैवानमधील वाढत्या तणावात आणखी भर पडली आहे. बीजिंगमध्ये आयोजित केलेल्या एका पत्रकार परिषदेत, चीनच्या तैवान व्यवहार कार्यालयाच्या प्रवक्ते पेंग किंगेन यांनी तैवान संदर्भातील आपली मूलभूत भूमिका स्पष्ट केली.

'एक देश, दोन प्रणाली' धोरण काय सांगते?

प्रवक्ते पेंग किंगेन यांनी सांगितले की, "एक देश, दोन प्रणाली" (One Country, Two Systems) या तत्त्वानुसार शांततापूर्ण पुनरेकीकरण करणे, हे चीनचे मूलभूत धोरण आहे. म्हणजेच, तैवानने चीनच्या प्रशासनाखाली यावे, पण त्यांना स्वायत्तता मिळेल. मात्र, अलीकडच्या या कठोर वक्तव्यामुळे 'एक चीन' या आपल्या सिद्धांतावर बीजिंग पूर्वीपेक्षा जास्त आक्रमक झाल्याचे संकेत मिळत आहेत. बीजिंग सध्या तरी तैवानवरील आपल्या भूमिकेबाबत जराही माघार घेण्याच्या मूडमध्ये दिसत नाही.

ट्रम्प यांनी केला होता संशय व्यक्त

एकीकडे चीन आपला पवित्रा कठोर करत असताना, दुसरीकडे अमेरिकेचे राष्ट्राध्यक्ष ट्रम्प यांनी पत्रकारांना सांगितले होते की, त्यांना खात्री नाही की या बैठकीत तैवानचा मुद्दा चर्चेसाठी उपस्थित केला जाईल की नाही. मात्र, चीनच्या या ताज्या आणि आक्रमक वक्तव्यामुळे आता बैठकीत तैवानचा मुद्दा चर्चेत येण्याची शक्यता वाढली आहे.

तैवानचे चीनला कडक प्रत्युत्तर

चीनच्या या आक्रमक भूमिकेला तैवाननेही सडेतोड उत्तर दिले आहे. तैवानच्या राष्ट्रीय सुरक्षा ब्युरोचे संचालक त्साई मिंग-येन यांनी स्पष्ट केले आहे की, चीनचे जे "देशभक्त मॉडेल" (Patriotic Model) हाँगकाँग आणि मकाऊमध्ये लागू करण्यात आले आहे, ते तैवानवर लागू करणे शक्य नाही. ते म्हणाले की, बीजिंग तैवानची आंतरराष्ट्रीय प्रतिमा कमकुवत करून त्याला हाँगकाँग आणि मकाऊसारखे बनवण्याचा प्रयत्न करत आहे. मात्र, तैवान एक सार्वभौम लोकशाही देश आहे आणि चीनचे हे मॉडेल येथे चालणार नाही.

दरम्यान, या वादग्रस्त वक्तव्यामुळे दोन्ही देशांमधील तणाव अधिक वाढण्याची चिन्हे आहेत.