एनआयए, एटीएस आणि आयबीची संयुक्त धाड
जयपूर: राष्ट्रीय तपास संस्था, दहशतवाद विरोधी पथक आणि गुप्तचर विभागाने राजस्थानमधील जोधपूर, जैसलमेर आणि सांचोर येथील काही ठिकाणी छापे टाकून देशविरोधी कारवायांमध्ये सामील असल्याचा संशय असलेल्या ५-६ संशयितांना ताब्यात घेतले आहे.
सरकारी सूत्रांनी दिलेल्या माहितीनुसार, सुरक्षा एजन्सीच्या या संयुक्त पथकांनी अचानक आणि एकाच वेळी अनेक ठिकाणी कारवाई केली. जोधपूरच्या चोखा परिसरातील एका मदरसामधून मौलवी अयुब याला चौकशीसाठी ताब्यात घेण्यात आले. दुसरा छापा जोधपूरपासून ६० किलोमीटर दूर असलेल्या पिपाड सिटीमध्ये टाकण्यात आला, जिथे उस्मान नावाच्या धर्मोपदेशकाला पकडण्यात आले.
अयुबकडून संशयास्पद ऑनलाइन कारवायांचे आणि परदेशी क्रमांकावरून आलेल्या फोन कॉलचे रेकॉर्ड सापडले, तर उस्मानकडून काही संवेदनशील कागदपत्रे आणि इलेक्ट्रॉनिक उपकरणे जप्त करण्यात आली. ते एखाद्या मोठ्या नेटवर्कशी किंवा विघातक संघटनेशी जोडलेले आहेत का, याबाबत तपास यंत्रणा अटक केलेल्या व्यक्तींची कसून चौकशी करत आहेत.