El Nino ची पाठ फिरताच 2027 मध्ये येणार La Nina चं महासंकट; अतिवृष्टी आणि महापुराचा इशारा

जगभरातील हवामानाचे चक्र वेगाने बदलत असून आता एक नवीन आणि अत्यंत चिंतेची बातमी समोर आली आहे. एल निनोचा प्रभाव ओसरत असतानाच आता आणखी एका नैसर्गिक संकटाची टांगती तलवार जगावर आली आहे. जागतिक हवामान संघटनेच्या (WMO) प्राथमिक अंदाजानुसार, 2027 च्या सुरुवातीला प्रशांत महासागरात ला निनाची (La Nina) स्थिती निर्माण होण्याची दाट शक्यता वर्तवण्यात आली आहे. या हवामान बदलामुळे जगातील अनेक भागांमध्ये पाऊस, तापमान आणि वाऱ्यांच्या पद्धतीत मोठे बदल होणार आहेत, ज्याचे गंभीर परिणाम भारतालाही सहन करावे लागतील.

सध्या जगभरात एल निनोचे सावट असून अनेक देशांमध्ये दुष्काळसदृश भीषण परिस्थिती निर्माण झाली आहे. भारतातही काही भागांत तीव्र दुष्काळ तर काही ठिकाणी अवकाळी पाऊस आणि महाचक्रीवादळांचा तडाखा बसत आहे. अशातच हवामान विभागाने दिलेल्या नव्या इशाऱ्याने चिंता आणखी वाढवली आहे. एल निनोचा प्रभाव पूर्णपणे ओसरल्यानंतर लगेचच ला निनाचे चक्र सुरू होणार आहे, ज्यामुळे आगामी वर्ष अतिशय धोकादायक ठरू शकते.

फेब्रुवारी 2027 ठरणार सर्वात निर्णायक!

जागतिक हवामान संघटनेनं स्पष्ट केलंय की, फेब्रुवारी 2027 मध्ये ला निना प्रशांत महासागरात पूर्णपणे सक्रीय होईल. एल निनोचा प्रभाव जानेवारीपर्यंत कमी होऊन, त्यानंतर लगेचच ला निनाची स्थिती निर्माण होईल. हा बदल साधारणपणे 2 ते 7 वर्षांच्या कालावधीत घडणाऱ्या नैसर्गिक चक्राचा एक भाग आहे. या हवामान बदलामुळे अतिवृष्टी, तीव्र थंडी आणि महापुरासारख्या भयंकर आपत्ती ओढवू शकतात. विशेषतः किनारपट्टीवरील भागांना आणि शेतकर्‍यांना याचा सर्वाधिक फटका बसण्याची शक्यता वर्तवण्यात आली आहे.

ला निना म्हणजे नेमके काय?

जेव्हा प्रशांत महासागराच्या पूर्वेकडील भागातील पाण्याचे तापमान अचानक थंड होते, तेव्हा पश्चिमेकडील भागातील हवेचा दाब कमी होतो. यामुळे वारे पाण्याची वाफ ढगांच्या स्वरूपात पश्चिमेकडे घेऊन येतात आणि परिणामी तिथे मुसळधार अतिवृष्टी होते. या संपूर्ण नैसर्गिक प्रक्रियेला 'ला निना' असे म्हटले जाते. या प्रक्रियेमुळे येत्या काळात जगाला महापूर आणि चक्रीवादळांचा सामना करावा लागेल. त्यामुळे आगामी काळातील हवामानातील प्रत्येक हालचालीवर बारीक लक्ष ठेवावे लागणार आहे.