नवी दिल्ली: राष्ट्रवादी काँग्रेसचे नेते बाबा सिद्दीकी यांच्या हत्येतील मुख्य सूत्रधार अनमोल बिश्नोईला भारताने ताब्यात घेतले आहे. अनमोल हा लॉरेन्स बिश्नोईचा भाऊ आहे. खोट्या पासपोर्टच्या आधारे तो अमेरिकेत वास्तव्य करत होता. त्याला आता अमेरिकेमधून भारताने ताब्यात घेतले आहे. १९ नोव्हेंबर रोजी आयजीआय विमानतळावर एनआयए आणि दिल्ली पोलिसांच्या विशेष पथकाच्या कडक सुरक्षेत त्याला थेट पटियाला हाऊस कोर्टात नेण्यात आले. जिथे न्यायालयाने त्याला कोठडी सुनावली आहे.
२०२२ पासून बनावट पासपोर्टवर अमेरिकेत लपून बसलेल्या अनमोलवर १८ हून अधिक गंभीर प्रकरणांचे आरोप आहे. ज्यात बाबा सिद्दीकी आणि पंजाबी गायक सिद्धू मूसेवालाची हत्या, सलमान खानच्या गॅलेक्सी अपार्टमेंटमध्ये गोळीबार आणि परदेशातून ऑनलाइन धमक्या यांचा समावेश आहे. तो अमेरिकेतून गुन्हेगारी कारवाया आणि खंडणी रॅकेट चालवत होता.
अनमोलच्या बाबतीत असा युक्तिवाद करण्यात आला आहे की, त्याची कोठडीत चौकशी करणे आवश्यक आहे कारण तो अनेक गंभीर प्रकरणांमध्ये आणि आंतरराष्ट्रीय गुन्हेगारी नेटवर्कमध्ये सामील आहे. एनआयए अनमोल बिश्नोईविरुद्ध न्यायालयात तपशीलवार आरोप सादर करत आहे, ज्यामध्ये दहशतवादी सिंडिकेट चालवणे, खंडणी, शस्त्रास्त्र पुरवठा आणि परदेशी नेटवर्क चालवणे यासारख्या कारवाया समाविष्ट आहेत.
तर अनमोल बिश्नोईच्या वकिलांनी न्यायालयाला सांगितले की एनआयएकडे आधीच सर्व पुरावे आहेत. त्यामुळे कोठडीची आवश्यकता नाही. अनमोल तपासात पूर्ण सहकार्य करणार असून पळून जाण्याची कोणतीही शक्यता नाही. त्यामुळे त्याला कोठडी नको अशी मागणी वकिलांनी न्यायालयाकडे केली आहे. पर्यायी, त्यांनी असा युक्तिवाद केला की जर कोठडी मंजूर झाला तर डीके बसूच्या अटकेच्या सर्वोच्च न्यायालयाच्या मार्गदर्शक तत्त्वांचे पालन केले पाहिजे.
न्यायालयाचा निर्णय
न्यायालयाने मान्य केले की आरोप अत्यंत गंभीर असून खटल्याची व्याप्ती खूप मोठी आहे. न्यायालयाने अनमोलला त्याची भाषा, अटक मेमो आणि वैद्यकीय तपासणीबद्दल प्रश्न विचारले आणि संपूर्ण कायदेशीर प्रक्रियांचे पालन करण्यात आल्याची पुष्टी केली. आरोपीने न्यायालयात सांगितले की त्याला हिंदी आणि इंग्रजी समजते आणि त्याला अटक मेमोची प्रत मिळाली आहे. त्यानंतर, न्यायालयाने आरोपीला ११ दिवसांसाठी एनआयए कोठडीत पाठवले.