मुंबई: पुणे–मुंबई द्रुतगती महामार्गावर आज पहाटे एक भीषण अपघात झाला आहे. पुण्याहून मुंबईकडे जाणाऱ्या मार्गावरील ट्रक चालकाचा ताबा सुटल्याने ट्रकने बॅरियर ओलांडत थेट मुंबईहून पुण्याकडे येणाऱ्या मार्गामध्ये प्रवेश केला. बॅरियर ओलांडल्यावर हा ट्रक समोरून येणाऱ्या चारचाकीवर उलटला. हा धडक इतकी जबरदस्त होती की चारचाकीच्या पुढील भागाचा चक्काचूर झाला. या भीषण अपघातात दोघांचा जागीच मृत्यू झाला असून चार जण जखमी झाले आहेत.
या अपघातात मृत्यू झालेल्यांपैकी चारचाकीमधील चालकाचा समावेश आहे. तर चारचाकीमधील अन्य चार जण गंभीर जखमी झाले आहेत. गंभीर जखमींना सोमाटणे फाटा येथील पवना हॉस्पिटलमध्ये दाखल करण्यात आले असून त्यांच्यावर उपचार सुरू आहेत. मुंबई पुणे एक्सप्रेसवरील हा अपघात कामशेत येथे पुणे लेनवर पहाटे सुमार चार वाजता झाला.
दरम्यान, अपघातानंतर एक्सप्रेसवेवरील वाहतूक दीड तास ठप्प झाली होती. मुंबईहून पुण्याकडे जाणाऱ्या लेनवर तब्बल दहा किलोमीटर लांबीची वाहनरांग लागली होती. अपघातग्रस्त वाहने रस्त्याच्या कडेला हलवल्यानंतर वाहतूक पुन्हा सुरळीत करण्यात आली. महामार्ग पोलिसांनी अपघातस्थळी पंचनामा करत पुढील तपास सुरू केला आहे. प्राथमिक माहितीनुसार ट्रक चालकाचा ताबा सुटल्याने हा भीषण अपघात झाल्याचा अंदाज व्यक्त केला जात आहे.