कडोंमपाकडून पुलाच्या डांबरीकरण व दुरुस्तीच्या कामास सुरुवात
कल्याण : कल्याण-डोंबिवली महानगरपालिकेच्या वतीने कल्याण पूर्व व पश्चिमेला जोडणाऱ्या स्व. आनंद दिघे उड्डाणपुलाच्या डांबरीकरण व दुरुस्तीचे काम हाती घेण्यात आले असून, या काळात उड्डाणपूल वाहतुकीसाठी पूर्णपणे बंद राहणार आहे. २५ नोव्हेंबर ते ४ डिसेंबरच्या मध्यरात्रीपर्यंत ही वाहतूक मर्यादा लागू राहील. या कालावधीत पुलावरील जुना डांबर थर काढून नव्या डांबरीकरणाचे काम केले जाणार आहे. कामाच्या दरम्यान परिसरातील वाहतूक सुरळीत ठेवण्यासाठी कोळसेवाडी वाहतूक उपविभागाने पर्यायी मार्ग निश्चित केले आहेत.
कल्याण पूर्वेतून स्व.आनंद दिघे पुलावरून कल्याण पश्चिमेला जाणाऱ्या वाहनांना प्रवेश बंदी करण्यात आली असून ही वाहने चक्कीनाका व श्रीराम चौक मार्गे वळवली जातील. कल्याण पश्चिमेतून स्व. आनंद दिघे पुलावर येणाऱ्या वाहनांनाही प्रवेश बंद राहील. ही वाहने सम्राट चौक येथून सरळ पुढे छत्रपती शिवाजी महाराज प्रवेशद्वार–शांतीनगर–श्रीराम चौक मार्गे कल्याण पूर्वेकडे वळतील. उल्हासनगर व कल्याण पश्चिमहून कल्याण पूर्वेकडे येणाऱ्या वाहनांना सम्राट चौक येथे प्रवेशबंदी राहील. वाहतूक विभाग पोलीस उपआयुक्त पंकज शिरसाट यांच्या आदेशानुसार ही अधिसूचना जारी करण्यात आली असून २५ नोव्हेंबरपासून अंमलबजावणी होणार आहे. अत्यावश्यक सेवेतील वाहनांसाठी पोलीस वाहने, अग्निशमन दल, रुग्णवाहिका, ग्रीन कॉरिडोर व ऑक्सिजन गॅस वाहने यांना बंदीमधून सूट देण्यात आली आहे. महापालिका आणि वाहतूक विभागाने नागरिकांना पर्यायी मार्गांचा वापर करून अनावश्यक गर्दी टाळण्याचे आवाहन केले आहे.