पुणे : पुणे शहरात गुन्हेगारी कारवायांवर वचक ठेवण्यासाठी पुणे पोलिसांनी (Pune Police) आता एक मोठी आणि महत्त्वपूर्ण प्रतिबंधात्मक कारवाई केली आहे. शहरात दहशत निर्माण करणाऱ्या कुख्यात गुंड गजा मारणे याला पुणे शहर सोडण्याचे आदेश देण्यात आले आहेत. या आदेशामुळे गजा मारणे (Gaja Marne) याला आता पुणे शहराच्या हद्दीत राहता येणार नाही.
कारवाईचे नेमके कारण काय?
गजा मारणे याच्यावर पुणे शहरातील विविध पोलीस ठाण्यांमध्ये अनेक गंभीर गुन्हे दाखल आहेत. नुकताच त्याला कोथरूड येथील एका तरुणाला मारहाण केल्याप्रकरणी अटक करण्यात आली होती. त्यानंतर तो जामिनावर बाहेर आला. पोलिसांनी दिलेल्या माहितीनुसार, जामिनावर सुटका झाल्यानंतरही गजा मारणे याने पुन्हा गुन्हेगारी कृत्य सुरू केले. त्याच्या वाढत्या कारवाया आणि शहरातील शांततेसाठी असलेला धोका लक्षात घेऊन, पोलिसांनी त्याला प्रतिबंधात्मक कारवाई म्हणून पुणे शहरात राहण्यास बंदी घालण्याचा निर्णय घेतला आहे. या कारवाईमुळे गुंड गजा मारणे याला आता तात्काळ पुणे शहर सोडून दुसरीकडे जावे लागणार आहे. पुणे पोलिसांनी उचललेल्या या कठोर पावलामुळे शहरातील गुन्हेगारी पार्श्वभूमीच्या व्यक्तींमध्ये जरब निर्माण झाली असून, कायदा आणि सुव्यवस्था राखण्यासाठी हे मोठे पाऊल मानले जात आहे.
