कुडूस : वाडा नगरपंचायतीच्या नगराध्यक्षपदासाठी चार उमेदवार रिंगणात असून वाडा नगरपंचायत निवडणुकीत खरी लढत ही तिरंगी व चुरशीची होणार असल्याचे दिसत आहे. भाजपा, शिवसेना (शिंदेगट), शिवसेना (उबाठा) व माकप अशा चार राजकीय पक्षांकडून नगराध्यक्षपदासाठी आपले मातब्बर उमेदवार निवडणूक रिंगणात उतरवले आहेत. या सर्वच राजकीय पक्षांनी ही निवडणूक प्रतिष्ठेची केली असल्याने निवडणूक चुरशीची होणार यात शंकाच नाही. वाडा नगरपंचायतीत कोण बाजी मारून नगराध्यक्षपदाच्या खुर्चीत विराजमान होणार याकडे वाडावासीयांचे लक्ष लागले आहे. वाडा नगराध्यक्षपदासाठी भाजप कडून रिमा गंधे, शिवसेना (उबाठा) गटाकडून निकिता गंधे, शिवसेना ( शिंदे गटाकडून) हेमांगी पाटील, तर माकपकडून निकिता धानवा या निवडणुकीच्या रिंगणात उतरल्या आहेत, मात्र तीन उमेदवारांमध्ये खरी लढत चुरशीची व रंगतदार होणार असल्याचे दिसत आहे. अडीच -तीन वर्षांपूर्वी शिवसेना व राष्ट्रवादी काँग्रेस पक्ष या दोन राजकीय पक्षाच्या फुटीनंतर शिवसेना (शिंदेगट) शिवसेना (उबाठा गट) तर राष्ट्रवादी ( शरद पवार गट) व राष्ट्रवादी (अजित पवार गट) असे गट तयार झाले आहेत. या पक्ष फुटीमुळे मतांची ही मोठी विभागणी झाली आहे. भाजपमध्ये काही दिवसांपासून इतर पक्षांतील कार्यकर्त्यांची मोठी इनकमिंग सुरु असल्याने वाडा शहरात मोठी ताकद वाढली आहे. सबका साथ! सबका विकास व हिंदुत्व हे भाजपचे धोरण जनतेच्या पसंतीस उतरले असल्याचे दिसून येत आहे. नुकतेच भाजप प्रदेश अध्यक्ष रवींद्र चव्हाण यांनी वाडा येथील जिल्हा मध्यवर्ती कार्यालयात उमेदवार व कार्यकर्त्यांची बैठक घेऊन निवडणूक प्रचाराचा आढावा घेतला. तसेच निवडणूक संदर्भात योग्य मार्गदर्शन केल्याने कार्यकर्त्यांचे बळ व उत्साह वाढला आहे. काही दिवसांपूर्वी राज्याचे उपमुख्यमंत्री व शिवसेनेचे मुख्यनेते एकनाथ शिंदे यांची प्रचारसभा झाली आहे. मात्र वाडा शहरवासीयांची मते कुणाच्या पारड्यात पाडतात हे बघणे आता औत्सुक्याचे ठरणार आहे.