रोहिणी खडसेंच्या कार्यक्रमात महिलांची हाणामारी

जालना : राज्यात नगरपालिका आणि नगरपंचायतींच्या निवडणुकीच्या प्रचाराचा धुरळा उडत आहे. अनेक नेते प्रचारसभा आणि प्रचारफेऱ्यांच्या माध्यमातून जनतेशी संवाद साधत आहेत. या वातावरणात जालन्यातील राष्ट्रवादी काँग्रेसच्या नेत्या रोहिणी खडसे यांनी एक प्रचारसभा घेतली. या सभेत महिलांची तुंबळ हाणामारी झाली. अंबडमध्ये राष्ट्रवादी काँग्रेस शरदचंद्र पवार पक्षाच्या प्रचारसभेत महिलांची हाणामारी झाली.

श्रद्धा चांगले यांच्यासाठी रोहिणी खडसेंनी घेतलेल्या प्रचारसभेत हाणामारी झाली. ही हाणामारी क्षुल्लक कारणावरुन झाल्याचे समजते. कुठल्याश्या मुद्यावरुन महिलांमध्ये शा‍ब्दिक वाद झाला. थोड्याच वेळात महिलांनी एकमेकींना धक्काबुक्की करत हाणामारी सुरू केली. परिस्थिती हाताबाहेर जात असल्याचे बघून मंचावर उपस्थित असलेल्या महिला कार्यकर्त्यांनी सर्वांना शांत राहण्याचे आवाहन करायला सुरुवात केली. वारंवार आवाहन करुनही हाणामारी थांबत नव्हती. अखेर आयोजकांनी मध्यस्थी केली आणि परिस्थिती नियंत्रणात आणली.