मुंबई : रिंकू राजगुरूच्या ‘आशा’ या आगामी चित्रपटाने प्रेक्षकांची उत्सुकता चांगलीच वाढवली आहे. काही दिवसांपूर्वी प्रदर्शित झालेल्या टिझरमध्ये ‘बाई अडलीये म्हणून नडलीये’ ही प्रभावी टॅगलाईन आणि सायकलवरून गावागावांत फिरणाऱ्या आरोग्य सेविकेची झलक दाखवत चित्रपटाने सर्वांचे लक्ष वेधले होते. टिझरमधील वास्तववादी दृश्यांमुळे प्रेक्षकांच्या मनात आशाच्या प्रवासाबद्दल वेगळे कुतूहल निर्माण झाले.
या कुतूहलाला उधाण आले ते नुकत्याच प्रदर्शित झालेल्या ‘चालत रहा पुढे’ या प्रेरणादायी गाण्यामुळे. आशाच्या संघर्षाला बळ देणारे हे गीत सोशल मीडियावर मोठ्या प्रमाणात व्हायरल झाले असून, प्रेक्षकांनी तिच्या जिद्दीचे आणि धैर्याचे कौतुक केले आहे. यानंतर प्रदर्शित झालेला दमदार ट्रेलर तर प्रेक्षकांच्या अपेक्षा आणखी वाढवणारा ठरला आहे.
चित्रपटाचा ट्रेलर लाँच आयुष्यमान भारत – मिशन महाराष्ट्र समितीचे अध्यक्ष डॉ. ओमप्रकाश शेटे, ज्येष्ठ साहित्यिक व ९९व्या अखिल भारतीय साहित्य संमेलनाचे अध्यक्ष विश्वास पाटील, लोढा फाउंडेशनच्या अध्यक्षा मंजू मंगलप्रभात लोढा आणि आशा सेविका यांच्या उपस्थितीत पार पडला.
‘आशा’ हा महिलांच्या संघर्षाचा वास्तववादी प्रवास मांडणारा चित्रपट आहे. ट्रेलरमध्ये रिंकूने साकारलेली आशा गावोगावी आरोग्याची जबाबदारी पेलताना, कुटुंबातील ताणतणावांचा सामना करताना, अन्यायासमोर ठामपणे उभी राहताना दिसते. तिच्या आयुष्यातील वेदना, तळमळ आणि न थकणारी धडपड ट्रेलरमधून स्पष्टपणे जाणवते.
रिंकूसोबत सयंकित कामत, उषा नाईक, शुभांगी भुजबळ, सुहास शिरसाट, दिशा दानडे, दिलीप घारे आणि हर्षा गुप्ते या कलाकारांनी चित्रपटाला अधिक बळ दिले आहे. महिलांच्या आयुष्यातील कठोर निर्णय, सामाजिक वास्तव, भावनिक दडपण आणि अस्मितेची सतत सुरू असलेली लढाई या सर्वांचा प्रभावी संगम चित्रपटात पाहायला मिळणार आहे. ‘आशा’ ही कथा एका सेविकेपुरती मर्यादित नसून दररोज जीवनाशी दोन हात करणाऱ्या लाखो महिलांची कहाणी आहे.
दीपक पाटील दिग्दर्शित ‘आशा’चे निर्माते कुमार मंगत पाठक, अभिषेक पाठक, निलेश कुवर, दैवता पाटील आणि दीपक पाटील असून मुरलीधर चटवानी आणि रवींद्र औटी सहनिर्माते आहेत. पॅनोरमा स्टुडिओज या बॅनरखाली प्रदर्शित होणारा हा चित्रपट १९ डिसेंबर रोजी प्रेक्षकांच्या भेटीस येत आहे. टिझर, गाणे आणि ट्रेलरमुळे ‘आशा’विषयीची उत्सुकता सध्या उच्चांक गाठत आहे.