मुंबई: भारतातील क्रिकेट विश्व सध्या चर्चेत आहे. केवळ पुरुष नाही तर भारतीय महिला संघाचेसुद्धा सर्वत्र कौतुक सुरू आहे. दरम्यान एक महत्त्वाची बातमी समोर आली आहे. भारत आणि न्यूझीलंड यांच्यात तीन सामन्यांची वनडे मालिका जानेवारीपासून होणार आहे. या मालिकेतील पहिला सामना ११ जानेवारीला बडोद्यामध्ये खेळला जाणार आहे. या मालिकेसाठी भारतीय संघातून रोहित शर्मा आणि विराट कोहली खेळण्यास सज्ज झाले आहेत. देशांतर्गत विजय हजारे ट्रॉफीत दोघांनी आपला फॉर्म काय आहे तो दाखवून दिल्यानंतर चाहत्यांमध्ये त्यांची क्रेझ मोठ्या प्रमाणात वाढली आहे. याचा पुरावा म्हणजे ११ जानेवारीपासून सुरू होणाऱ्या मालिकेतील पहिल्या सामन्यासाठी तिकीट खिडकी खुली झाली आणि अवघ्या 8 मिनिटात तिकीटं विकली गेली.
तिकीट विक्रीच्या या वेगामुळे रोहीत आणि विराटची फलंदाजी पाहण्यासाठी क्रीडाप्रेमींमधील क्रेझ दिसून येते. महत्त्वाचे म्हणजे विराट कोहली आणि रोहित शर्मा त्यांच्या क्रिकेट करिअरच्या शेवटच्या टप्प्यात आहेत. तसेच त्यांच्यासाठी हे वर्ष खूपच महत्त्वाचे आहे. कारण पुढच्या वर्षी वनडे वर्ल्डकप स्पर्धा होणार आहे. त्याच्या तयारीसाठी या दोघांना या वर्षात खूपच मेहनत घ्यावी लागणार आहे. कारण या दोघांना वनडे वर्ल्डकप २०२७ मध्ये खेळण्याची इच्छा आहे. पण त्यासाठी फॉर्मही तितकाच महत्त्वाचा आहे.
विराट कोहली आणि रोहित शर्मा यांनी टी२० आणि कसोटी संघातून निवृत्ती घेतली आहे. पण आता ते फक्त वनडे फॉर्मेटमध्ये खेळत आहे. त्यांच्या फलंदाजीची धार अजूनही कायम आहे. दक्षिण अफ्रिकेविरुद्धच्या वनडे मालिकेत त्यांनी क्रीडाप्रेमींचे चांगलेच मनोरंजन केले. आता न्यूझीलंडविरुद्धच्या वनडे मालिकेतही तशीच अपेक्षा आहे. विराट कोहलीने दक्षिण अफ्रिकेविरुद्धच्या वनडे मालिकेतील दोन सामन्यात शतक आणि तिसऱ्या सामन्यात अर्धशतकी खेळी केली होती. तर रोहित शर्माची बॅटही चांगलीच तळपली होती. ऑस्ट्रेलिया दौऱ्यातही या दोघांच्या फलंदाजीची जादू दिसली होती.
भारत आणि न्यूझीलंड यांच्यात तीन सामन्यांची वनडे मालिका ११ जानेवारीपासून होत आहे. या मालिकेतील पहिला सामना बडोद्याच्या बीसीए स्टेडियममध्ये होणार आहे. तर दुसरा सामना १४ जानेवारीला राजकोटमध्ये आणि तिसरा सामना इंदूरमध्ये होलकर मैदानात होणार आहे. या स्पर्धेसाठी भारतीय संघात कोण खेळाडू असणार याची घोषणा २ किंवा ३ जानेवारी होणार आहे.