मुंबई : मराठी मनोरंजन विश्वातून एक धक्कादायक बातमी समोर आली असून बिग बॉस मराठी फेम अभिनेता जय दुधाणेला ठाणे पोलिसांनी अटक केली आहे. सुमारे ५ कोटी रुपयांच्या आर्थिक फसवणुकीच्या आरोपाखाली जयला मुंबई आंतरराष्ट्रीय विमानतळावरून ताब्यात घेण्यात आले. हनिमूनसाठी निघालेल्या जयची थेट जेलवारी झाल्याने संपूर्ण इंडस्ट्रीत खळबळ उडाली आहे.
ठाण्याचा रहिवासी असलेला जय दुधाणे हा अभिनेता असण्यासोबतच व्यावसायिकही आहे. प्राथमिक तपासात जिम व्यवसायाच्या नावाखाली बनावट कागदपत्रे तयार करून दुकानांची बेकायदेशीर विक्री केल्याचा आरोप त्याच्यावर करण्यात आला आहे. एकाच दुकानाची विक्री वेगवेगळ्या व्यक्तींना करून मोठ्या प्रमाणात आर्थिक फसवणूक केल्याची माहिती पोलिस तपासात समोर आली आहे.
या प्रकरणात जयने अनेक नागरिकांची सुमारे ५ कोटी रुपयांची फसवणूक केली असल्याची सांगितले जात आहे. ठाणे पोलिसांनी या प्रकरणात आर्थिक फसवणुकीचे गंभीर कलम लावले असून पुढील तपास सुरू आहे.
या गुन्ह्यात केवळ जयच नव्हे तर त्याच्या कुटुंबीयांचाही समावेश करण्यात आला आहे. दाखल करण्यात आलेल्या एफआयआरमध्ये जयची आई, बहीण, आजी आणि आजोबांची नावे असून पोलिसांकडून त्यांच्या भूमिकेची चौकशी सुरू आहे. अटकेनंतर जयला न्यायालयात हजर करण्यात आले असून या प्रकरणात आणखी कोणाची नावे समोर येतात का, याकडे सर्वांचे लक्ष लागले आहे.
दरम्यान, जय दुधाणेच्या वैयक्तिक आयुष्यातही या घटनेमुळे मोठा धक्का बसला आहे. २४ डिसेंबर २०२५ रोजी सोशल मीडिया इन्फ्लुएन्सर हर्षला पाटील हिच्याशी त्याने थाटामाटात विवाह केला होता. लग्नाचे फोटो सोशल मीडियावर व्हायरल झाले असतानाच अवघ्या दहा दिवसांतच जयवर अटकेची कारवाई झाल्याने त्याच्या पत्नीला आणि चाहत्यांना मोठा धक्का बसला आहे.
जयने आपल्या करिअरची सुरुवात स्प्लिट्सविला १३ या रिअलिटी शोमधून केली होती. या शोचा विजेता ठरल्यानंतर त्याने बिग बॉस मराठी ३ मध्ये उपविजेतेपद मिळवलं. त्यानंतर 'गडद अंधार' आणि 'वेडात मराठे वीर दौडले सात' यांसारख्या चित्रपटांतून त्याने आपली ओळख निर्माण केली.
पोलीस तपासात आणखी धक्कादायक खुलासे समोर येण्याची शक्यता व्यक्त केली जात आहे.