पुणे : पुण्याच्या राजकीय वर्तुळातून उमेदवारा बाबत एक घटना समोर आली आहे. पुण्यातील एका व्यक्तीने अजित पवार गटाच्या उमेदवाराच्या त्रासाला कंटाळून आत्महत्या केल्याची घटना समोर आली आहे. आत्महत्या करणाऱ्या व्यक्तीच नाव सादिक कपूर असून तो मकोकामधील फरार आरोपी होता.
प्रशांत जगताप यांना लिहिलेलं पत्र
२० डिसेंबर रोजी सादिक कपूर यांनी आत्महत्येपूर्वी पुरावा म्हणून एक पत्र राष्ट्रवादी काँग्रेस (शरद पवार गटाचे ) माजी शहराध्यक्ष प्रशांत जगताप याना लिहिल्याचं समोर आलं आहे. पत्रात अनेक खुलासे केले आहेत. जीवाला असलेला धोका आणि दबावाबाबत लिहिले आहे.
पत्रातील खुलासे
पत्रातील आरोपांनुसार राष्ट्रवादी उमेदवार फारुख इनामदार (शेख) हा टिपू पठाण टोळीचा म्होरक्या आहे. त्याच्याकडून प्रचंड त्रास दिला जात आहे. वरिष्ठांनी हस्तक्षेप करून याला वेळीच रोखा अशी कळकळीची विनंती या पत्राद्वारे केली होती.
का उचलले टोकाचे पाऊल?
दुर्दैवाने या पत्राची वेळीच दखल न घेतल्याने त्रास अधिकच वाढला आणि सादिक कपूर यांनी टोकाचे पाऊल उचलले असल्याचे स्पष्ट झाले आहे. लिहिलेल्या ३० पानांच्या सुसाईड नोट मध्ये आणि हातावर लिहिलेल्या मजकुरात फारूक इनामदार यांचे नाव आढळल्याने आता पोलिसांवरही दबाव वाढला आहे. या पत्रामुळे सादिक आणि फारूक यांच्यातील वाद केवळ जमिनीपुरता नसून त्याला गुन्हेगारी आणि राजकीय पदरही असल्याचे स्प्ष्ट होत आहे.
पोलिस तपास
दरम्यान, पुणे पोलीस आता या जुन्या पत्राचा आणि सुसाईड नोटचा आधार घेऊन तपासाची चक्रे फिरवत आहेत. निवडणुकांच्या धामधुमीत एका उमेदवाराचे नाव अशा प्रकारे गुन्हेगारी टोळीशी जोडले गेल्यामुळे पुण्याच्या राजकीय वर्तुळात मोठी खळबळ उडाली आहे. पोलिसांनी दिलेल्या माहितीनुसार, सादिक कपूर हा हडपसर परिसरातील कुख्यात गुंड टिपू पठाण याच्यासोबतच्या 'मोक्का' गुन्ह्यात पाहिजे होता.