मुंबई : मुंबई महानगरपालिका निवडणुकीच्या तोंडावर राज ठाकरेंच्या मनसे मोठा धक्का बसला आहे. मनसेचे कट्टर नेते आणि वरळी विभागातील प्रमुख कार्यकर्ते संतोष धुरी यांनी सोमवारी रात्री मुख्यमंत्री देवेंद्र फडणवीस यांची भेट घेतली. मंत्री नितेश राणे यांनी ही भेट घडवून आणली. प्रभाग क्रमांक १९४ मधून तिकीट न मिळाल्याने धुरी गेल्या काही दिवसांपासून नाराज होते.
प्रभाग क्रमांक १९२ आणि १९४ या दोन जागांवर उबाठा आणि मनसेत तिढा होता. अखेर या वादावर तोडगा काढत प्रभाग १९२ मनसेकडे राहिला, तर प्रभाग १९४ उबाठाला सोडण्यात आला. मात्र, प्रभाग क्रमांक १९४ मधून माजी नगरसेवक संतोष धुरी यांनी निवडणूक लढवण्याची इच्छा व्यक्त केली होती. त्यांचा या क्षेत्रात दीर्घकाळ सक्रिय सहभाग आणि प्रभाव होता. परंतु जागावाटपात हा प्रभाग उबाठाला गेल्याने संतोष धुरी यांच्यासह त्यांच्या समर्थकांमध्ये मोठी नाराजी निर्माण झाली. या निर्णयानंतर संतोष धुरी काही काळ नॉट रिचेबल झाले होते.