मुंबई : मुंबई महानगरपालिका निवडणुकीसाठी आज मतदान पार पडत असताना, दहिसरमधील वॉर्ड क्रमांक २ मध्ये एक अत्यंत भावनिक दृश्य पाहायला मिळाले. या वॉर्डातील भाजपच्या उमेदवार तेजस्वी घोसाळकर (Tejasvee Ghosalkar) आज मतदानाला सामोरे जाण्यापूर्वी आपल्या दिवंगत पतीच्या आठवणीने भावूक झाल्या. घरात पूजा उरकल्यानंतर दिवंगत अभिषेक घोसाळकर (Abhishek Ghosalkar) यांच्या प्रतिमेला वंदन करताना त्यांना आपले अश्रू अनावर झाले. मुंबईतील वॉर्ड क्रमांक २ ही यंदाच्या निवडणुकीतील सर्वात 'हाय व्होल्टेज' जागा मानली जात आहे. येथे भाजपकडून तेजस्वी घोसाळकर तर शिवसेना (उद्धव बाळासाहेब ठाकरे) पक्षाकडून धनश्री कोलगे यांच्यात थेट लढत होत आहे. अभिषेक घोसाळकर यांच्या अकाली निधनानंतर ही पहिलीच निवडणूक असल्याने, तेजस्वी घोसाळकर या आपल्या पतीचा राजकीय वारसा पुढे नेण्यासाठी मैदानात उतरल्या आहेत.
काय म्हणाल्या तेजस्वी घोसाळकर ?
माजी नगरसेवक अभिषेक घोसाळकर यांच्या खळबळजनक हत्येनंतर, त्यांच्या पत्नी तेजस्वी घोसाळकर पहिल्यांदाच निवडणुकीच्या रिंगणात उतरल्या आहेत. मतदानाच्या दिवशी घराबाहेर पडण्यापूर्वी त्यांनी देवाचे दर्शन घेतले, मात्र पतीच्या फोटोला वंदन करताना त्यांचा संयम सुटला आणि त्यांना भरून आले. काही महिन्यांपूर्वीच अभिषेक घोसाळकर यांची गोळ्या झाडून हत्या करण्यात आली होती. या धक्क्यातून सावरत तेजस्वी यांनी राजकारणात येण्याचा धाडसी निर्णय घेतला. "आज शारीरिकदृष्ट्या अभिषेक सोबत नसले, तरी त्यांची साथ आणि आशीर्वाद पाठीशी आहेत," अशी भावना त्यांनी व्यक्त केली. आजच्या मतदानाच्या दिवशी पतीच्या आठवणीने तेजस्वी यांना हुंदका आवरता आला नाही, हे पाहून उपस्थितांचेही डोळे पाणावले. भाजपच्या तिकिटावर वॉर्ड क्रमांक २ मधून निवडणूक लढवत असलेल्या तेजस्वी घोसाळकर यांच्यासमोर शिवसेनेच्या (UBT) धनश्री कोलगे यांचे कडवे आव्हान आहे. अभिषेक घोसाळकर यांनी या वॉर्डात केलेले काम आणि त्यांच्या हत्येनंतर निर्माण झालेली सहानुभूती तेजस्वी यांच्या पाठीशी आहे. मात्र, ठाकरे गटानेही ही जागा प्रतिष्ठेची केल्याने या वॉर्डातील लढत मुंबईत सर्वात जास्त चर्चेत राहिली आहे. पतीच्या हत्येनंतर खचून न जाता जनसेवेसाठी मैदानात उतरलेल्या तेजस्वी घोसाळकर यांच्यासाठी ही निवडणूक म्हणजे त्यांच्या आयुष्यातील एक मोठा अग्निपरीक्षा आहे. एका बाजूला पतीच्या जाण्याचे दुःख आणि दुसऱ्या बाजूला निवडणुकीतील चुरस, अशा परिस्थितीत तेजस्वी यांनी दाखवलेले धैर्य कौतुकास्पद मानले जात आहे. आता वॉर्ड क्रमांक २ मधील जनता अभिषेक यांच्या कार्यावर आणि तेजस्वी यांच्या धैर्यावर किती विश्वास दाखवते, हे उद्याच्या निकालात स्पष्ट होईल.