मुंबई : देशाची आर्थिक राजधानी अशी ओळख मिरवणाऱ्या मुंबई महापालिकेसाठी गुरुवार १५ जानेवारी रोजी एकूण ५२.९४ टक्के मतदान झाले. आज म्हणजेच शुक्रवार १६ जानेवारी २०२६ रोजी सकाळी दहा वाजल्यापासून मतमोजणी सुरू झाली आहे. सकाळी साडेदहा पर्यंत टपाली मतमोजणीच्या हाती आलेल्या आकडेवारीनुसार भाजपने १२, शिवसेनेने १०, उबाठाने ९, मनसेने ६, काँग्रेसने ५, इतरांनी चार जागांवर आघाडी घेतली आहे. ही अगदी सुरुवातीचा आघाडी आहे.
मुंबई मनपासाठी ५२.९४ टक्के मतदान
मुंबई महापालिकेसाठी गुरुवार १५ जानेवारी रोजी एकूण ५२.९४ टक्के मतदान झाले. संध्याकाळपर्यंत ५४ लाख ७६ हजार ४३ मतदारांनी मतदान केले. मुंबईत २९ लाख २३ हजार ४३३ पुरुष आणि २५ लाख ५२ हजार ३५९ महिला तसेच २५१ इतर मतदारांनी मतदान केले.
मुंबई महानगरपालिका क्षेत्रात एकूण १ कोटी ३ लाख ४४ हजार ३१५ मतदार नोंदणीकृत असून, यामध्ये ५५ लाख १६ हजार ७०७ पुरुष, ४८ लाख २६ हजार ५०९ महिला आणि १ हजार ९९ इतर मतदारांचा समावेश आहे. सकाळी मतदानाला सुरुवात झाल्यानंतर सुरुवातीच्या टप्प्यात मतदानाची गती मंद होती, मात्र दुपारनंतर मतदानात वाढ झाली.
काही भागांमध्ये मतदान केंद्र बदलण्यात आल्याने मतदारांची धावपळ उडाल्याचे चित्र पाहायला मिळाले. मतदार यादीत नावे नसणे, तसेच मतदानानंतर बोटावरील शाई पुसली जात असल्याच्या तक्रारीही समोर आल्या आहेत. या प्रकारांमुळे अनेक मतदारांनी नाराजी व्यक्त केली.
मुंबई अशी सुरू आहे मतमोजणी
- मुंबई शहरात एकूण २३ मतमोजणी अधिकारी आहेत.
- प्रत्येक अधिकारी साधारण दहा वॉर्डची जबाबदारी सांभाळणार
- एकावेळी केवळ दोन वॉर्डची मतमोजणी होणार, यामुळे पहिल्या टप्प्यात ४६ नंतर दुसऱ्या टप्प्यात ४६ या पद्धतीने मतमोजणीचे नियोजन आहे. जर कोणताही आक्षेप आला नाही तर पाच टप्प्यात मतमोजणी पूर्ण होईल. पण आक्षेप आल्यामुळे एखाद्या मतदारसंघाची मतमोजणी नव्याने करावी लागली अथवा विशिष्ट ईव्हीएमची मतमोजणी पुन्हा केली तर या प्रक्रियेत खर्ची होणार असलेल्या वेळेमुळे मतमोजणीस विलंब होणार आहे.