वाहनधारकांसाठी महत्वाची बातमी आहे. तुम्ही जर अजूनही तुमच्या गाडीला नवीन नंबरप्लेट बसवून घेतली नसेल तर तुमचे नुकसान होईल. तुम्ही हाय सिक्युरिटी रजिस्ट्रेशन प्लेट (HSRP) बसवून घेण्यासाठी टाळाटाळ करत असाल तर आताच सावध व्हा! ज्यांनी ही नंबरप्लेट बसवून घेतली नाही त्यांच्यावर कडक कारवाई केली जाणार आहे.
सरकारने ही नंबर प्लेट बसवून घेण्याची ३१ डिसेंबर २०२५ ही अंतिम तारीख दिली होती, मात्र असं असूनही अनेक गाडयांना HSRP नंबर प्लेट नसल्याचे परिवहन विभागाच्या लक्षात येताच त्यांनी आता कडक कारवाई करण्याचे ठरवले आहे.
१८ फेब्रुवारीपासून होणार कारवाई:
वाहनधारकांना एचएसआरपी नंबरप्लेट बसवणे अनिवार्य केले होते. अनेकांनी अजूनही हे काम केले नाही. त्यामुळे त्यांच्याकडून दंड वसूली केली जाणार आहे. १८ फेब्रुवारीपासून वाहनांवर कारवाई केली जाणार असल्याचे संकेत परिवहन आयुक्त विवेक भिमनगर यांनी दिले आहेत.
पुणे आणि पिंपरी चिंचवडमध्ये लाखो वाहनधारकांनी अजूनही नंबरप्लेट बसवलेली नाही. जवळपास २४ लाखांहून अधिक वाहनधारकांना एचएसआरपी नंबरप्लेट बसवायची होती. मात्र, फक्त साडेआठ लाख वाहनधारकांनी एचएसआरपी नंबरप्लेट बसवली आहे. जवळपास ६५ टक्के वाहनधारकांनी नंबरप्लेट बसवलेली नाही. त्यामुळेच हा कारवाईचा बडगा उचलला आहे.
किती भरावा लागणार दंड?
एचएसआरपी नंबरप्लेट न बसवल्यास तुम्हाला रोख रक्कम दंड भरावा लागणार आहे. १,००० रुपयांपासून ते १०,००० रुपयांपर्यंतचा दंड तुम्हाला भरावा लागू शकतो.