पालघर: पालघरमध्ये धक्कादायक प्रकार उघड झाला आहे. औषधांच्या नावाखाली दारूची तस्करी सुरु असल्याचा हा प्रकार समोर असून याप्रकरणी तलासरी पोलिसांनी कारवाई केली आहे. या कारवाईत २६.२८ लाखांचा अवैध दारूसाठा जप्त केला आहे.
पोलिसांकडून मिळालेल्या माहितीनुसार, पालघर जिल्ह्यात अंमली पदार्थांविरोधात सुरू असलेल्या मोहिमेअंतर्गत तलासरी पोलिसांनी अवैध दारू वाहतूक करणाऱ्या आरोपीवर कारवाई केली आहे. या कारवाईत तब्बल २६ लाख २८ हजार ३२० रुपयांचा मुद्देमाल जप्त करण्यात आला आहे. मुंबई -अहमदाबाद महामार्गावर ही कारवाई करण्यात आली आहे.
औषधांच्या नावाखाली दारूची तस्करी
महामार्गावरुन मुंबईकडे जाणाऱ्या टाटा टेम्पोमधून औषधांच्या नावाखाली महाराष्ट्रात प्रतिबंधित असलेल्या दारूची वाहतूक होत असल्याची गोपनीय माहिती पोलिसांना मिळाली होती. हिमाचल-पंजाब ढाबा परिसरात टेम्पोची तपासणी केली असता, ९ लाख २८ हजार ३२० रुपयांची दारू आढळून आली. वाहनासह एकूण २६.२८ लाख रुपयांचा मुद्देमाल जप्त करण्यात आला.
दरम्यान या प्रकरणी चालक शिवेंद्रकुमार लालबाबु ठाकुर याला अटक करण्यात आली आहे. तसेच तलासरी पोलीस ठाण्यात महाराष्ट्र दारूबंदी अधिनियमान्वये गुन्हा दाखल करण्यात आला असून पुढील तपास सुरू आहे.