चेन्नई: शनिवार ७ फेब्रुवारी २०२६ पासून आयसीसी चा टी२० विश्वचषक सुरू झाला आहे. आज म्हणजेच मंगळवार १० फेब्रुवारी रोजी या स्पर्धेतील अकरावा सामना खेळला गेला. चेन्नईच्या चेपॉक स्टेडियमवर न्यूझीलंड विरुद्ध यूएई असा सामना रंगला. या सामन्यात युएईला धूळ चारत न्यूझीलंडचा एकतर्फी विजय झाला आहे.
असा रंगला सामना:
न्यूझीलंड विरुद्ध यूएई या सामन्यान नाणेफेक जिंकून पहिल्यांदा फलंदाजी करताना UAE च्या संघाने अवघ्या १२ धावांवर आपली पहिली विकेट गमावली. पण त्यानंतर अलीशान शराफू आणि कर्णधार मुहम्मद वसीमची जोडी चांगली खेळली. या दोघांनी केलेल्या शतकी भागीदारीच्या जोरावर UAE च्या संघाने ६ विकेट्सच्या बदल्यात १७३ धावा केल्या. ही UAE ची टी-२० वर्ल्ड कप स्पर्धेतील सर्वोच्च धावसंख्या ठरली.
अलीशान शराफू शेवटपर्यंत टिकला असता तर UAE च्यासंघाने या सामन्यात २०० धावांचा आकडाही गाठला असता. पण मार्क चॅपमन आणि डॅरिल मिचेल या दोघांनी सीमारेषेवर कमालीचा ताळमेळ दाखवत त्याची कॅच पकडली.
मुहम्मद वसीमचं नाबाद अर्धशतक:
अलीशान शराफू याने ४७ चेंडूत ५ चौकार आणि २ षटकारांच्या मदतीने ५५ धावांची खेळी केली. तो माघारी फिरल्यावर कर्णधार मुहम्मद वसीम याने ४५ चेंडूत ४ चौकार आणि ३ षटाकरांच्या मदतीने नाबाद ६६ धावांची खेळी करत संघाच्या धावफलकावर १७३ धावा लावल्या. न्यूझीलंडच्या संघाकडून मॅट हेन्रीनं सर्वाधिक २ तर जेकब डफी, लॉकी फर्ग्युसन, मिचेल सँटनर आणि ग्लेन फिलिप्स यांनी प्रत्येकी १-१ विकेट घेतली.
न्यूझीलंडचा एकतर्फी विजय:
कहर म्हणजे न्यूझीलंड संघाने १७४ धावांचे लक्ष २८ चेंडू आणि १० विकेट्स शिल्लक ठेऊन गाठले. न्यूझीलंडचा हा एकतर्फी विजय ऐतिहासिक ठरला. टिम सेफर्टने ४२ चेंडूत ८९ धावांची धमाकेदार खेळी केली. या डावात त्याने १२ चौकार आणि तीन षटकार मारले. दरम्यान, फिन अॅलनही ५० चेंडूत ८४ धावा केल्या. त्याने त्याच्या धमाकेदार खेळीत पाच चौकार आणि पाच षटकारही मारले. टी-२० विश्वचषकाच्या इतिहासात विकेट्सच्या बाबतीत न्यूझीलंडचा हा सर्वात मोठा विजय आहे.
न्यूझीलंडपूर्वी पाच संघांनी टी-२० विश्वचषकात १० विकेट्सने विजय मिळवला. २०२६ च्या टी-२० विश्वचषकात न्यूझीलंडचा हा सलग दुसरा विजय आहे. या विजयासह, न्यूझीलंडने ग्रुप डी पॉइंट्स टेबलमध्ये पहिले स्थान मिळवले आहे. किवींचा पुढील सामना १४ फेब्रुवारी रोजी दक्षिण आफ्रिकेविरुद्ध होणार आहे.