दिल्ली: शनिवार ७ फेब्रुवारी २०२६ पासून आयसीसी चा टी२० विश्वचषक सुरू झाला असून गुरुवार १२ फेब्रुवारी रोजी भारत विरुद्ध नामिबिया हा सामना होणार आहे. दिल्लीच्या अरुण जेटली या मैदानात हा सामना खेळला जाईल. मात्र या सामन्यात सलामीवीर अभिषेक शर्मा खेळू शकेल की नाही यावर शंका व्यक्त केली जात असतानाच ईशान किशन देखील जखमी झाल्याच्या बातम्या समोर येत आहे. त्यामुळे कर्णधार सूर्याच्या अडचणी वाढल्या आहेत.
मिळालेल्या माहितीनुसार, भारत आणि नामिबिया या सामन्यापूर्वी टीम इंडियाच्या खेळाडूंनी सराव केला. या वेळी ईशान किशनच्या पायाला दुखापत झाल्याची माहिती आहे. जसप्रीत बुमराहनं टाकलेला यॉर्कर ईशान किशनच्या डाव्या पायाच्या अंगठ्यावर आदळला. ज्यामुळं ईशान किशनला सरावादरम्यान वेदना होत असल्याचं पाहायला मिळालं. यानंतर ईशान किशन फिजिओकडून उपचार घेत असल्याचं देखील पाहायला मिळालं.
ईशान किशनला दुखापत झाली असली तरी चांगली बाब म्हणजे त्यानं पुन्हा सराव सुरु केला. मात्र, दुसऱ्यांदा सराव सुरु केल्यानंतर त्यानं लगेच पुढील ५ मिनिटांमध्ये सराव बंद केला. बीसीसीआयकडून याबाबत कोणतीही अधिकृत माहिती शेअर करण्यात आलेली नाही. त्यामुळे ईशान आजची मॅच खेळू शकेल की नाही हे निश्चित सांगता येणार नाही. मात्र या घडामोडींमुळे करणार सूर्यकुमारच्या अडचणीत नक्कीच वाढ झाली आहे.
अभिषेक शर्मा आजच्या मॅच मधून बाहेर ?
सूत्रांनी दिलेल्या माहितीनुसार अभिषेक शर्मा आजारी आहे. त्याचं पोट बिघडलं आहे आणि त्याला तापही आहे. त्यामुळे तो हा सामना खेळण्याची शक्यता कमीच आहे. त्याला संघ प्रशासनाकडून विश्रांती दिली जाईल, असं चिन्ह आहे. भारताचा पुढील सामना पाकिस्तानशी आहे. त्या सामन्यापूर्वी अभिषेकची तब्येत ठीक होणं जास्त महत्त्वाचं आहे.
सामना कुठे पाहता येईल ?
टी-२० विश्वचषकाचे प्रसारणाचे हक्क भारतात स्टार नेटवर्ककडे आहेत. त्यामुळे हा सामना टीव्हीवर स्टार स्पोर्ट्स नेटवर्कच्या विविध वाहिन्यांवर पाहता येईल. यात इंग्रजी व हिंदीसह तामिळ, कन्नड, भोजपुरी, मराठी, बंगाली, तेलुगू अशा भाषांमध्येही हा सामना पाहता येईल. तर ऑनलाईन हा सामना जिओ हॉटस्टार या ओटीटी प्लॅटफॉर्मवर आणि वेबसाईटवर पाहता येईल.
भारतीय संघ :- सूर्यकुमार यादव (कर्णधार), अक्षर पटेल (उपकर्णधार), संजू सॅमसन, अभिषेक शर्मा, ईशान किशन, तिलक वर्मा, रिकू सिंग, शिवम दुबे, हार्दिक पांड्या, अर्शदीप सिंग, जसप्रीत बुमराह, हर्षित राणा, वरुण चक्रवर्ती, कुलदीप यादव आणि वॉशिंग्टन सुंदर
नामिबिया संघ :- गेरार्ड इरास्मुस (कर्णधार), झेन ग्रीन, बर्नार्ड शोल्झ, रुबेन ट्रेपलमान, जेजे स्मिट, जैन फ्रिलिंक, लॉरेन स्टिनकैप, मालन कुगर, निकोल लॉफ्टी-इटन, जॅक ब्रसेल, बेन शिकाँगो, जेसी बॉल्ट, ठापतन लिशर, डब्ल्यूपी मायबर्ग आणि मॅक्स हेगो.