मुंबई: देशांतर्गत शेअर बाजारात आज आठवड्याच्या पहिल्याच दिवशी (१६ फेब्रुवारी) सुरुवातीच्या सत्रात चढउतार पाहायला मिळाले. व्यवहाराची सुरुवात घसरणीने झाली असली तरी लगेचच खरेदीचा जोर वाढल्याने सेन्सेक्स आणि निफ्टी हे दोन्ही प्रमुख निर्देशांक हिरव्या निशाणात पोहोचले. मात्र ही तेजी फार काळ टिकली नाही. सुरुवातीच्या वीस मिनिटांनंतर विक्रीचा दबाव वाढल्याने निर्देशांक पुन्हा घसरले. सकाळी दहा वाजेपर्यंत सेन्सेक्स सुमारे ०.१६ टक्के आणि निफ्टी ०.१२ टक्क्यांच्या किरकोळ वाढीसह व्यवहार करत होते.
आज सकाळी दहा वाजेपर्यंतच्या व्यवहारात काही आघाडीच्या समभागांमध्ये चांगली खरेदी दिसून आली. पॉवर ग्रिड कॉर्पोरेशन, कोल इंडिया, एचडीएफसी बँक, एनटीपीसी आणि ओएनजीसी यांच्या समभागांत २.४० टक्क्यांपर्यंत वाढ नोंदवली गेली. याउलट जिओ फायनान्शियल, इन्फोसिस, हिंडाल्को इंडस्ट्रीज, अदानी पोर्ट्स आणि अदानी एंटरप्रायझेस यांच्या समभागांमध्ये १.५० टक्क्यांहून अधिक घसरण दिसून आली.
एकूण बाजारातील चित्र मिश्र स्वरूपाचे होते. सुमारे २,६४६ समभागांमध्ये सक्रिय व्यवहार सुरू होते. त्यापैकी ८५८ समभाग वाढीसह हिरव्या निशाणात होते, तर १,७८८ समभाग घसरणीसह लाल निशाणात व्यवहार करत होते. सेन्सेक्समधील ३० पैकी ११ समभाग वाढीत होते, तर १९ समभागांवर विक्रीचा दबाव होता. निफ्टीमधील ५० पैकी १३ समभाग वाढीसह तर ३७ समभाग घसरणीसह व्यवहार करत होते.
व्यवहाराच्या सुरुवातीला बीएसई सेन्सेक्स १४६ अंकांच्या घसरणीसह ८२,४८० या पातळीवर उघडला. त्यानंतर खरेदी वाढल्याने तो ८२,७८६ पर्यंत कसळला; मात्र पुन्हा विक्री वाढल्याने चढउतार कायम राहिले. सकाळी सुमारे १०.१५ वाजता सेन्सेक्स १३० अंकांच्या वाढीसह ८२,७५७ या पातळीवर व्यवहार करत होता. निफ्टीचीही सुरुवात ४७ अंकांच्या घसरणीसह २५,४२३ या स्तरावर झाली होती. पुढे तो २५,५२८ पर्यंत गेला, परंतु नंतर पुन्हा दबावाखाली आला. सकाळी दहा वाजता निफ्टी सुमारे ३० अंकांच्या वाढीसह २५,५०१ या स्तरावर व्यवहार करत होता.
गेल्या आठवड्याच्या शेवटच्या सत्रात मात्र बाजारात मोठी घसरण झाली होती. शुक्रवारी सेन्सेक्स तब्बल १,०४८ अंकांनी घसरून ८२,६२६ वर बंद झाला होता, तर निफ्टी ३३६ अंकांनी घसरून २५,४७१ वर स्थिरावला होता. त्याच्या पार्श्वभूमीवर आजच्या सत्रात गुंतवणूकदार सावध भूमिकेत असल्याचे चित्र दिसून आले.